Actor Mukesh: മീ ടൂ ക്യാമ്പെയിൻ - മുകേഷിനെതിരെ ചലച്ചിത്ര പ്രവർത്തകയുടെ ആരോപണം

ന്യൂഡൽഹി: മീ ടൂ ക്യാമ്പെയിൻ ആരോപണത്തിൽ കുടുങ്ങി നടനും എംഎൽഎയുമായ മുകേഷ്. സിനിമയുടെ സാങ്കേതിക പ്രവർത്തനരംഗത്ത് പ്രവർത്തിക്കുന്ന ടെസ് ജോസഫ് ആണ് മുകേഷിനെതിരെ ആരോപണം ഉന്നയിച്ചിരിക്കുന്നത്.

താൻ താമസിച്ചിരുന്ന ഹോട്ടൽ മുറിയിലെ ഫോണിൽ വിളിച്ച് മുകേഷ് പലതവണ ശല്യം ചെയ്തെന്ന് ടെസ് പറയുന്നു. 19 വർഷം മുമ്പ് നടന്ന സംഭവം ട്വിറ്ററിലൂടെയാണ് അവർ വെളിപ്പെടുത്തിയിരിക്കുന്നത്. ഒരു ചാനലിൻെറ പരിപാടിയുമായി ബന്ധപ്പെട്ട ജോലികൾ നടക്കവേയാണ് സംഭവം. മുകേഷ് നിരന്തരം വിളിച്ച് തൻെറ അടുത്ത റൂമിലേക്ക് മാറാൻ പറഞ്ഞെന്ന് അവർ ട്വീറ്റിൽ പറയുന്നു.


അന്ന് തൻെറ സ്ഥാപനത്തിൻെറ മേധാവിയായിരുന്ന ഡെറിക്ക് ഒബ്രയാനോട് ഇക്കാര്യം പറഞ്ഞിരുന്നു. അദ്ദേഹം ഇടപെട്ടാണ് പ്രശ്നം പരിഹരിച്ചത്. അദ്ദേഹത്തോട് ഇപ്പോഴും നന്ദിയുണ്ടെന്നും ടെസ് പറഞ്ഞു.


എന്നാൽ തനിക്ക് ഇത്തരത്തിൽ ഒരു കാര്യം ഓർമ്മയില്ലെന്ന് മുകേഷ് ഏഷ്യാനെറ്റ് ന്യൂസിനോട് പ്രതികരിച്ചു. 19 വർഷം മുമ്പ് നടന്ന സംഭവത്തെ കുറിച്ച് ഇപ്പോൾ പറയുന്നത് എന്ത് കൊണ്ടെന്ന് മനസ്സിലാവുന്നില്ല. ആരോപണത്തെ ചിരിച്ച് തള്ളുന്നുവെന്നും മുകേഷ് പറഞ്ഞു.