മീ ടൂ: സുഭാഷ് ഗായിക്കെതിരെ വെളിപ്പെടുത്തലുമായി കേറ്റ് ശർമ

മുംബൈ: ബോളിവുഡ് നിർമാതാവ് സുഭാഷ് ഗായിക്കെതിരെ ആരോപണവുമായി നടിയും മോഡലുമായ കേറ്റ് ശർമ രംഗത്ത്. പ്രശസ്‌ത സംവിധായകനും നിർമാതാവും തിരക്കഥാകൃത്തുമായ സുഭാഷ് ഗായിയും ഇതോടെ മീ ടൂ വെളിപ്പെടുത്തലിൽ അകപ്പെട്ടിരിക്കുകയാണ്. ഓഗസ്റ്റ് ആറിനാണ് സുഭാഷ് ഗായി തന്നോട് മോശമായി പെരുമാറിയതെന്ന് നടി വെളിപ്പെടുത്തി.

മുംബൈയിലെ വേഴ്‌സ‍ോവ പോലീസ് സ്റ്റേഷനിൽ കേറ്റ് ശർമ്മ സുഭാഷ് ഗായിക്കെതിരെ ഇത് സംബന്ധിച്ച് പരാതി നൽകി. സുഭാഷ് ഗായി തന്നോട് വീട്ടിലേക്ക് വരൻ പറഞ്ഞ ശേഷം ബലമായി കെട്ടി പിടിക്കുകയും ചുംബിക്കുകയും ചെയ്‌തെന്ന് കേറ്റ് ശർമ പരാതിയിൽ പറയുന്നു. ആറോളം ആളുകൾ സുഭാഷ് ഗായിയുടെ വീട്ടിൽ ഉണ്ടായിരുന്നു.അവരുടെ മുന്നിൽ വെച്ച് സുഭാഷ് ഗായി തന്നോട് ശരീരം മസാജ് ചെയ്തു തരാൻ ആവശ്യപ്പെട്ടു. ഗായിയുടെ ആവശ്യം കേട്ട താൻ ആദ്യം ഞെട്ടിയെങ്കിലും ഒരു മുതിർന്ന ആളോടുള്ള ബഹുമാനം കൊണ്ട് മസാജ് ചെയ്തു കൊടുത്തുവെന്നും കേറ്റ് വ്യക്തമാക്കി.എന്നാൽ കൈകഴുകാനായി പോയപ്പോൾ സുഭാഷ് ഗായി സംസാരിക്കാനുണ്ടെന്ന് പറഞ്ഞ് പിന്നാലെ വന്ന് കെട്ടി പിടിക്കുകയും ചുംബിക്കുകയും ചെയ്‌തെന്ന് പരാതിയിൽ വെളിപ്പെടുത്തുന്നു.


അന്ന് രാത്രി ഗായി തന്നോട് അവിടെ തങ്ങാൻ ആവശ്യപ്പെടുകയും ചെയ്‌തെന്ന് കേറ്റ് പരാതിയിൽ വ്യക്തമാക്കി. മീ ടൂ ക്യാമ്പെയിനിനെ പിന്തുണച്ച് സുഭാഷ് ഗായി കഴിഞ്ഞ ദിവസം രംഗത്ത് വന്നിരുന്നു. തനിക്കെതിരെ ആരോപണം ഉയർന്നതിൽ ദുഃഖമുണ്ടെന്നും തന്റെ അഭിഭാഷകർ വേണ്ട നടപടി സ്വീകരിക്കുമെന്നും സുഭാഷ് ഗായി ട്വീറ്റ് ചെയ്തു. താൻ എന്നും സ്ത്രീ ശാക്തീകരണത്തിന് ഒപ്പമാണെന്നും സുഭാഷ് ഗായി ട്വീറ്റ് ചെയ്തു.