അമിതാഭ് ബച്ചന് മോഹന്‍ലാലിന്റെ സര്‍പ്രൈസ്! അദ്ദേഹത്തെപ്പോലൊരു പ്രതിഭയ്‌ക്കൊപ്പം അഭിനയിക്കാനായത് എന്റെ പുണ്യം! വീഡിയോയിലൂടെ പിറന്നാളാശംസ നേര്‍ന്ന് മോഹന്‍ലാല്‍

ഇന്ത്യന്‍ സിനിമയുടെ അഭിമാന താരമായ അമിതാഭ് ബച്ചന്‍ 80ാം പിറന്നാളാഘോഷിക്കുകയാണ്. സിനിമാലോകവും ആരാധകരുമെല്ലാം ബിഗ് ബിക്ക് ആശംസ അറിയിച്ചെത്തിയിരുന്നു. ബിഗ് ബിയെക്കുറിച്ചുള്ള പോസ്റ്റുകളെല്ലാം നിമിഷനേരം കൊണ്ടാണ് വൈറലായി മാറുന്നത്. മലയാളി താരങ്ങളെല്ലാമായി അടുത്ത സൗഹൃദമുണ്ട് അദ്ദേഹത്തിന്. സിനിമയിലും പരസ്യങ്ങളിലുമൊക്കെയായി അദ്ദേഹത്തിനൊപ്പം പ്രവര്‍ത്തിക്കാനുള്ള അവസരം മോഹന്‍ലാലിനും മഞ്ജു വാര്യര്‍ക്കുമെല്ലാം ലഭിച്ചിരുന്നു. സാധാരണക്കാരനെപ്പോലെയായാണ് അദ്ദേഹം സെറ്റില്‍ പെരുമാറാറുള്ളത്. കൂടെയുള്ളവര്‍ ഇരുന്നതിന് ശേഷം മാത്രമേ ഇരിക്കാറുള്ളൂ. അത്രയും ലാളിത്യമാര്‍ന്ന പെരുമാറ്റമാണ് അദ്ദേഹത്തിന്റേതെന്നായിരുന്നു താരങ്ങളെല്ലാം പറഞ്ഞത്. പ്രിയപ്പെട്ട അമിതാഭ് ബച്ചന് ആശംസ അറിയിച്ച് മോഹന്‍ലാലും മഞ്ജു വാര്യരും വിഎ ശ്രീകുമാര്‍ മേനോനുമെല്ലാം എത്തിയിരുന്നു.
ഞാനടക്കമുള്ള ആളുകള്‍ക്ക് അദ്ദേഹം പ്രചോദനത്തിന്റെ തണല്‍മരമാണെന്നായിരുന്നു മോഹന്‍ലാല്‍ പറഞ്ഞത്. ഇന്ത്യന്‍ സിനിമയുടെ ആഗോള അംബാസിഡറാണ് അദ്ദേഹം, ഇതിഹാസമെന്നൊക്കെയുള്ള വാക്കുകള്‍ യാഥാര്‍ത്ഥ്യമാവുന്നത് അദ്ദേഹത്തെ കാണുമ്പോഴാണ്. കാലത്തിന് കീഴപ്പെടുത്താനാവാത്ത തരത്തിലുള്ള പ്രതിഭയാണ് അദ്ദേഹം. അദ്ദേഹത്തെപ്പോലൊരു നടനൊപ്പം ഒന്നിച്ച് അഭിനയിക്കാനായത് എന്റെ ജീവിതത്തിലെ വലിയ ഭാഗ്യമാണ്. എന്റെ ജീവിതപുണ്യമാണ് ആ അവസരങ്ങള്‍. ഹിന്ദിയിലും മലയാളത്തിലുമായാണ് ഞാന്‍ അദ്ദേഹത്തിനൊപ്പം അഭിനയിച്ചതെന്നുമായിരുന്നു മോഹന്‍ലാല്‍ പറഞ്ഞത്. വീഡിയോയിലൂടെയായാണ് അദ്ദേഹം അമിതാഭ് ബച്ചന് ആശംസ അറിയിച്ചത്.