ദിലീപിനെ തിരിച്ചെടുത്തത് ഐക്യകണ്ഠേന; എതിർപ്പുകൾ പരിശോധിക്കും: മോഹൻലാൽ

താരസംഘടനയായ അമ്മയിൽ ദിലീപിനെ തിരികെയെടുത്തതിനെ തുടര്‍ന്ന് ഉടലെടുത്ത വിവാദത്തിൽ വിശദീകരണവുമായി പ്രസിഡന്‍റ് മോഹൻലാൽ രംഗത്ത്. 'അമ്മ' എന്നും ആക്രമിക്കപ്പെട്ട നടിയുടെ പക്ഷത്ത് തന്നെയാണ് നിലകൊള്ളുന്നത്. എന്നാൽ ദിലീപിനെ തിരിച്ചെടുത്തത് ഐക്യകണ്ഠേനയാണെന്നും നിലവിൽ ഉയര്‍ന്നു വരുന്ന എതിര്‍പ്പുകൾ പരിശോധനയ്ക്ക് വിധേയമാക്കുമെന്നും മോഹൻലാൽ.



അമ്മ എന്ന വാക്കിന്‍റെ പൊരുൾ അറിഞ്ഞു കൊണ്ടാണ് ഇക്കാലമത്രയും സംഘടന നിലനിന്നതെന്ന് മോഹൻലാൽ വ്യക്തമാക്കി. ദിലീപിനെതിരെ ഉണ്ടായ പുറത്താക്കൽ നടപടി മരവിപ്പിക്കുക എന്നത് 2018 ജൂൺ ആറിനു ചേർന്ന അമ്മയുടെ പൊതുയോഗത്തിൽ ഒന്നായി ഉയർന്നു വന്ന പൊതു വികാരമാണ്. ഈ അഭിപ്രായത്തോടൊപ്പം നിൽക്കുക എന്ന പ്രാഥമികമായ ജനാധിപത്യ മര്യാദയാണ് അമ്മ നേതൃത്വം ചെയ്തതെന്നും മോഹൻലാൽ പുറത്തിറക്കിയ വാര്‍ത്താക്കുറിപ്പിലൂടെ വ്യക്തമാക്കുന്നു.



ഈ വിഷയത്തിൽ അതിനപ്പുറമുള്ള എന്തെങ്കിലും നിക്ഷിപ്ത താൽപര്യങ്ങളോ നിലപാടോ അമ്മ നേതൃത്വത്തിനില്ലെന്നും സാമ്പത്തികമായി പിന്നോക്കം നിൽക്കുന്ന കലാകാരന്മാരെ സാമ്പത്തികമായി സഹായിക്കാനൊക്കെയാണ് കേവലം 485 അംഗങ്ങൾ മാത്രമുള്ള അമ്മ മുൻകൈ എടുക്കുന്നത്. ഇതൊന്നും കൊട്ടിഘോഷിക്കാൻ അമ്മ തയ്യാറല്ല. ഇത്തരത്തിലൊരു സംഘടനയെ ഒറ്റയടിക്ക് മാഫിയ എന്നും സ്ത്രീ വിരുദ്ധ സംഘടനയെന്നും മുദ്ര കുത്തുന്നത് മനുഷ്യത്വ രഹിതമാണെന്നും മോഹൻലാൽ വാര്‍ത്താക്കുറിപ്പിലൂടെ ചൂണ്ടിക്കാട്ടുന്നു.