ബിജെപി സ്ഥാനാർത്ഥിയാകുന്ന കാര്യം അറിഞ്ഞിട്ടില്ല: മോഹൻലാൽ

തിരുവനന്തപുരം: അടുത്ത ലോക്‌സഭാ തെരഞ്ഞെടുപ്പിൽ തിരുവനന്തപുരത്ത് നിന്ന് ബിജെപി സ്ഥാനാർഥിയാകുന്ന കാര്യം അറിഞ്ഞിട്ടില്ലെന്ന് മോഹൻലാൽ. എന്നാൽ, മോഹൻലാൽ പാർട്ടിയോടൊപ്പം ചേരുന്നത് സന്തോഷമുള്ള കാര്യമാണെന്ന് സംസ്ഥാനാധ്യക്ഷൻ അഡ്വ.പി.എസ് ശ്രീധരൻ പിള്ള അറിയിച്ചു. അറിയാത്ത കാര്യത്തെ കുറിച്ച് പ്രതികരിക്കാനില്ലെന്നും താൻ തന്റെ ജോലിയിൽ വ്യാപൃതനാണെന്നും മോഹൻലാൽ പ്രതികരിച്ചു.

കഴിഞ്ഞ ദിവസം വിശ്വ ശാന്തി ട്രസ്റ്റിന്റെ പ്രവർത്തനവുമായി ബന്ധപ്പെട്ട് മോഹൻലാൽ പ്രധാനമന്ത്രി നരേന്ദ്ര മോദിയെ സന്ദർശിച്ചിരുന്നു. ആ കൂടിക്കാഴ്‌ചക്ക് ശേഷമാണ് തിരുവനന്തപുരത്ത് നിന്ന് മോഹൻലാൽ മത്സരിക്കുന്നു എന്ന തരത്തിലുള്ള വാർത്ത വന്നത്. താൻ ഇതിന് മുൻപും പല പ്രധാനമന്ത്രിമാരെയും സന്ദർശിച്ചിട്ടുണ്ടെന്നും ലാൽ വ്യക്തമാക്കി. കേരള മുഖ്യമന്ത്രി പിണറായി വിജയനെ പല തവണ കാണുകയും സംസാരിക്കുകയും ചെയ്തിട്ടുണ്ട്. ആ സമയത്തും ഇത് പോലെയുള്ള വാർത്തകൾ വന്നിട്ടുണ്ടെന്ന് മോഹൻലാൽ പ്രതികരിച്ചു.

അതെ സമയം, മോഹൻലാലുമായി സ്ഥാനാർഥിത്വം സംബന്ധിച്ച ചർച്ച നടന്നിട്ടില്ലെന്ന് ബിജെപി സംസ്ഥാനാധ്യക്ഷൻ അഡ്വ.പി.എസ് ശ്രീധരൻ പിള്ള വ്യക്തമാക്കി. മോഹൻലാൽ നിലവിൽ സേവാഭാരതിയുടെ പ്രവർത്തനങ്ങളുമായി സഹകരിക്കുന്നുണ്ട്. അദ്ദേഹം പാർട്ടിയിലേക്ക് വരുന്നതും സ്ഥാനാർഥിയാകുന്നതും വളരെയധികം സന്തോഷമുള്ള കാര്യമാണെന്നും അദ്ദേഹം വ്യക്തമാക്കി.