അതിഥി മേനോൻ എങ്ങനെ മിർണാ മേനോനായി! 'ബിഗ് ബ്രദർ' നായികയുടെ വിശേഷങ്ങൾ
അതിഥി മേനോൻ
കേരളത്തിൽ കുടുംബ വേരുകളുള്ള അതിഥിയുടെ ജനനം ചെന്നൈയിലായിരുന്നു. ചാനൽ പരിപാടികളിൽ അവതാരികയായിട്ടായിരുന്നു തുടക്കം. പിന്നീട് തമിഴ് സിനിമാ ലോകത്തേക്ക് അവസരം ലഭിച്ചു. പട്ടതാരി, കളവാണി മാപ്പിളൈ തുടങ്ങിയ തമിഴ് സിനിമകളിൽ അഭിനയിച്ചിട്ടുമുണ്ട് താരം.
അതിഥി ഇനി മിർണാ
ബിഗ് ബ്രദർ എന്ന മോഹൻലാൽ സിനിമയിലൂടെയാണ് താരം മലയാളത്തിൽ അരങ്ങേറിയിരിക്കുന്നത്. മലയാളത്തിലെത്തിയ താരം മിർണാ എന്ന പേരു സ്വീകരിക്കുകയായിരുന്നു. കഴിഞ്ഞ വർഷം സെപ്റ്റംബറിലായിരുന്നു താരം മിർണാ മേനോൻ എന്ന പേര് സ്വീകരിച്ചത്.
ഒരു വിവാദം
തമിഴിൽ പട്ടതാരി എന്ന സിനിമയിലൂടെയാണ് താരം അരങ്ങേറിയത്. ചിത്രത്തിൽ നായകനായിരുന്ന അഭി ശരവണനുമായി താരം പ്രണയത്തിലാണെന്ന രീതിയിൽ വാർത്തകൾ വന്നിരുന്നു. താൻ അതിഥിയെ വിവാഹം ചെയ്തുവെന്ന വാദവുമായി നടന് അഭി ശരവണന് രംഗത്ത് വരികയുമുണ്ടായി. എന്നാൽ താരം ഇത് നിഷേധിക്കുകയും തനിക്ക് നേരെ വ്യാജപ്രചരണങ്ങള് നടത്തുന്നുവെന്നാരോപിച്ച് പോലീസില് പരാതി നല്കുകയുമായിരുന്നു. എന്നാൽ താനും അതിഥിയും തമ്മിലുള്ള വിവാഹം മധുരയില് വച്ച് കഴിഞ്ഞുവെന്നാണ് അഭി പറഞ്ഞിട്ടുള്ളത്. ഇതിന് തെളിവായി വിവാഹ സര്ട്ടിഫിക്കറ്റും നടിയോടൊപ്പമുള്ള ഒരുപാട് ചിത്രങ്ങളും നടന് പരസ്യപ്പെടുത്തി. അതേസമയം, അഭി ശരവണനെ താന് വിവാഹം കഴിച്ചിട്ടില്ലെന്ന വാദത്തില് ഉറച്ചു നില്ക്കുകയായിരുന്നു അതിഥി. തനിക്കെതിരേ വ്യാജ തെളിവുകള് ഉണ്ടാക്കുകയാണെന്നും അതിഥി ആരോപിച്ചിരുന്നു. അതിനുശേഷം ഇപ്പോൾ മിർണാ എന്ന പേര് സ്വീകരിച്ച് മലയാള സിനിമാ ലോകത്ത് സജീവമായിരിക്കുകയാണ് താരം.
ഇൻസ്റ്റ ലവർ
മിർണാ ഓഫീഷ്യൽ എന്ന തന്റെ ഇൻസ്റ്റ പേജിലൂടെ നിരവധി ചിത്രങ്ങൾ താരം പങ്കുവയ്ക്കാറുണ്ട്. ഒരു ലക്ഷത്തിലേറെ ഫോളോവേഴ്സുണ്ട് താരത്തിന്. താരം പങ്കുവയ്ക്കുന്ന ഗ്ലാമർ ചിത്രങ്ങൾ ഏറെ വൈറലാവാറുമുണ്ട്.
'ബിഗ് ബ്രദറി'ലെ ആര്യ ഷെട്ടി
സിദ്ദിഖ് സംവിധാനം ചെയ്ത് മോഹൻലാൽ നായകനാകുന്ന ബിഗ് ബ്രദറിൽ ആര്യ ഷെട്ടി എന്ന കഥാപാത്രമായാണ് താരം എത്തുന്നത്. മോഹൻലാലും താരവും ചേർന്നഭിനയിച്ച കണ്ടോ കണ്ടോ എന്ന ചിത്രത്തിലെ ഗാനം യൂട്യൂബിൽ വൈറലായിട്ടുമുണ്ട്.
പേര് മാറ്റത്തിന് പിന്നിൽ
താൻ പേരുമാറ്റാനുണ്ടായ കാരണമെന്തെന്ന് താരം ഇതുവരെ വെളിപ്പെടുത്തിയിട്ടില്ല. ഇതിന് മുമ്പ് നാല് തവണ താരം പേര് മാറ്റിയിട്ടുണ്ടെന്ന് ചില തമിഴ് മാധ്യമങ്ങൾ റിപ്പോർട്ട് ചെയ്തിട്ടുണ്ട്. മലയാള സിനിമയിൽ എത്തിയപ്പോൾ 'മ'യിൽ തുടങ്ങുന്ന പേര് താരം സ്വീകരിച്ചതാണെന്നും അണിയറ സംസാരമുണ്ട്.
മേക്കോവറോടെ മലയാളത്തിൽ
തമിഴിൽ കൂടുതലും നാടൻ പെൺകുട്ടി വേഷങ്ങളായിരുന്നു താരത്തിന് ലഭിച്ചിരുന്നത്. എന്നാൽ മലയാളത്തിലെ ആദ്യ സിനിമയിൽ തന്നെ തനി മോഡേൺ ഗേളായാണ് താരം അഭിനയിക്കുന്നത്. മോഹൻലാൽ അഭിനയിക്കുന്ന കഥാപാത്രമായ സച്ചിദാനന്ദന്റെ പ്രണയിനിയായ ആര്യ ഷെട്ടി എന്ന കഥാപാത്രമാണ് താരത്തിന് ലഭിച്ചിരിക്കുന്നത്.
3 നായികമാരിൽ ഒരാൾ
ബിഗ് ബ്രദർ എന്ന ചിത്രത്തിൽ മൂന്ന് നായികമാരുണ്ട്. മിർണാ മേനോനെ കൂടാതെ ഹണി റോസ്, ശിൽപ അജയൻ എന്നിവരാണവർ. ഇതിൽ മോഹൻലാലിന്റെ നായികാ വേഷമാണ് മിർണായ്ക്ക് ലഭിച്ചിരിക്കുന്നത്.