'പണത്തിനായി റിവ്യൂ പറയുന്ന പ്രവണത കൂടുന്നു, ഇത് ബോധപൂര്‍വ്വം സിനിമകളെ തക‍ര്‍ക്കുന്നു': സിദ്ദിഖ്

സോഷ്യൽ മീഡിയയിലെ സിനിമാ നിരൂപണ പ്രവണതയ്ക്കെതിരെ ആഞ്ഞടിച്ച് സംവിധായകൻ സിദ്ദിഖ്. വര്‍ധിച്ചുവരുന്ന നിരൂപണ പ്രവണത സിനിമാ വ്യവസായത്തെ തകര്‍ക്കാനെ ഉപകരിക്കൂവെന്ന് സിദ്ദിഖ് ചൂണ്ടിക്കാട്ടി. തീയേറ്ററുകളിലെത്തുന്ന സിനിമകളെ ബോധപൂര്‍വ്വം തകര്‍ക്കാനുള്ള ശ്രമങ്ങള്‍ സോഷ്യല്‍ മീഡിയ വഴി നടക്കുകയാണെന്ന് സംവിധായകന്‍ സിദ്ദിഖ് വ്യക്തമാക്കി. സ്വന്തമായുണ്ടാക്കി പുറത്തുവിടുന്ന സിനിമാ നിരൂപണങ്ങളിലൂടെ പണം സ്വരൂപിക്കാനുള്ള ശ്രമങ്ങളും ചിലര്‍ നടത്തുന്നതായും സിദ്ദിഖ് ചൂണ്ടിക്കാട്ടി.

മോഹൻലാലിനെ നായകനാക്കി സിദ്ദിഖ് സംവിധാനം ചെയ്ത ബിഗ് ബ്രദർ എന്ന ചിത്രം കഴിഞ്ഞ ആഴ്ചയാണ് തീയേറ്ററുകളിലെത്തിയത്. ചിത്രം തീയേറ്ററുകളിൽ നിന്ന് സമ്മിശ്ര പ്രതികരണമാണ് നേടുന്നത്. പിന്നാലെ എത്തിയ മറ്റു ചിത്രങ്ങൾ മികച്ച അഭിപ്രായങ്ങൾ സ്വന്തമാക്കിയപ്പോൾ ബിഗ് ബ്രദറിന് അത് വലിയ തിരിച്ചടിയായിരുന്നു. സോഷ്യൽ മീഡിയയിലും ചിത്രത്തിന് വളരെ മോശം നിരൂപണങ്ങളാണ് ലഭിച്ചുകൊണ്ടിരിക്കുന്നത്.

Also Read: 'എന്ത് ചെയ്യാനാ, ഓരോരോ പിള്ളേര് കൈയ്യും പെരുപ്പിച്ച് എട്ടുപത്ത് പായ്ക്കുമായി വന്നോളും, വെറുതെ നമ്മളെ ഇട്ടു ബുദ്ധിമുട്ടിക്കാനായി!'

മോഹന്‍ലാല്‍ ചിത്രം ബിഗ് ബ്രദറിന്‍റെ ജി.സി.സി റിലീസിങിന്‍റെ ഭാഗമായി ദോഹയില്‍ സംസാരിക്കവേ ആണ് സംവിധായകന്‍ സിദ്ദിഖ് ഇക്കാര്യം പറഞ്ഞത്. നടന്‍ സിദ്ദിഖും സംവിധായകനൊപ്പം ദോഹയിലെത്തിയിരുന്നു. സോഷ്യല്‍ മീഡിയയില്‍ വര്‍ധിച്ചുവരുന്ന നിരൂപണ പ്രവണതകളെ നിയമം വഴി തടയല്‍ എളുപ്പമല്ലെന്നും അതിനാല്‍ പ്രേക്ഷകരുടെ പിന്തുണ കൊണ്ട് മാത്രമേ ഇതിനെ ചെറുത്ത് തോല്‍പ്പിക്കാന്‍ കഴിയൂ എന്നും സംവിധായകൻ സിദ്ദിഖ് ചൂണ്ടിക്കാട്ടി.

പുതിയ സിനിമകളുടെ സാമ്പത്തിക വിജയത്തില്‍ ജി.സി.സി രാജ്യങ്ങളിലെ റിലീസിങ് വഹിക്കുന്ന പങ്ക് വളരെ നിര്‍ണായകമാണെന്നും സംവിധായകന്‍ സിദ്ദിഖ് വ്യക്തമാക്കി. ഹാസ്യം തീര്‍ന്നതിനാലല്ല താൻ ട്രാക്ക് മാറ്റിയതെവ്വപം ഒരു ചേഞ്ചിന് വേണ്ടിയാണ് ആക്ഷനിലേക്ക് മാറി ചിന്തിച്ചതെന്നും സംവിധായകൻ സിദ്ദിഖ് കൂട്ടിച്ചേര്‍ത്തു.

Also Read: 'തലമുറയുടെ ആവശ്യം'; രാജ്യത്തെ പ്രതിഷേധങ്ങളെ കുറിച്ച് ടൊവിനോ തോമസ്

കേരളം ഒറ്റക്കെട്ടായാണ് പൗരത്വ നിയമ ഭേദഗതിയെ എതിര്‍ക്കുന്നതെന്നും ഇത്തരം സമരങ്ങള്‍ സിനിമാ വ്യവസായത്തെ യാതൊരു വിധത്തിലും ബാധിച്ചിട്ടില്ലെന്നും സിദ്ദിഖ് വ്യക്തമാക്കി. അതേസമയം എല്ലാ വിഷയത്തിലും എല്ലാവരും പ്രതികരിക്കണം എന്ന് നിര്‍ബന്ധിക്കുന്നത് ജനാധിപത്യപരമല്ല എന്നും നടന്‍ സിദ്ദിഖ് പ്രതികരിച്ചു.