തന്‍റെ കണ്ണടയിലൂടെ ലാല്‍ ഓരോ നിമിഷവും ഒപ്പിയെടുത്തു

ദിവസങ്ങൾക്ക് ശേഷം മലയാളികളുടെ പ്രിയതാരം മോഹൻലാൽ വീണ്ടും തന്‍റെ ആരാധകർക്കിടയിലേക്ക് വന്നദിനം ഫാൻസുകാര്‍ ആഘോഷമാക്കി. കൊച്ചി ഇടപ്പള്ളിയിൽ മൈജി എന്ന ഷോപ്പ് ഉദ്ഘാടനത്തിനായെത്തിയ അദ്ദേഹം 18 കിലോ തൂക്കം കുറച്ച് ഏറെ ഫിറ്റായാണ് വന്നത്. അടുത്ത വർഷം പുറത്തിറങ്ങുന്ന ഒടിയൻ എന്ന സിനിമയ്ക്കായുള്ള മെയ്ക്ക്ഓവറാണിത്.

എന്നാല്‍ പതിവിൽ നിന്ന് വിപരീതമായി സൺഗ്ലാസ് വച്ചുകൊണ്ടായിരുന്നു ലാല്‍ മുഴുവൻ സമയവും നിന്നിരുന്നത്. കാറില്‍ ഫാൻസുകാരുടെ ആഘോഷത്തിനിടയിലേക്ക് വന്നപ്പോഴും ഷോപ്പ് ഉദ്ഘാടനത്തിനായി അകത്തേക്ക് കയറിയപ്പോഴുമൊക്കെ തന്‍റെ മുഖത്ത് നിന്ന് സൺഗ്ലാസ് മാറ്റാന്‍ അദ്ദേഹം തയ്യാറായിരുന്നില്ല. അദ്ദേഹം ധരിച്ചിരുന്നത് ക്യാമറ ഘടിപ്പിച്ച പ്രത്യേക സൺഗ്ലാസ് ആണെന്നാണ് അണിയറ സംസാരം.

തന്‍റെ പുത്തൻ ലുക്ക് ആളുകള്‍ ഏതുതരത്തിലാണ് എടുത്തിരിക്കുന്നതെന്നറിയുന്നതിനും തന്നെ കാണുമ്പോഴുള്ള ആളുകളുടെ പെട്ടെന്നുള്ള പ്രതികരണം ഏതുതരത്തിലുള്ളതാണെന്ന് നേരിട്ടുതന്നെ അറിയുന്നതിനുമാണ് നടുക്ക് ക്യാമറ ഘടിപ്പിച്ച സൺഗ്ലാസ് അദ്ദേഹം സർവ്വസമയവും വച്ചിരുന്നതെന്ന് മോഹൻലാലുമായി അടുത്ത വൃത്തങ്ങള്‍ അറിയിച്ചു.