ലാലും സുചിയും ഒന്നായിട്ട് ഇന്നേക്ക് 30 വർഷം

മുപ്പത് വര്‍ഷത്തിലേക്കെത്തി നില്‍ക്കുകയാണ് മോഹന്‍ലാലിന്റെയും സുചിത്രയുടെയും ദാമ്പത്യ ജീവിതം. നടന്റെ ഫാൻ പേജുകളില്‍ നിറയെ മോഹൻലാലിന്റെയും ഭാര്യ സുചിത്രയുടെയും ചിത്രങ്ങൾ നിറഞ്ഞുകഴിഞ്ഞു. 1988 ഏപ്രില്‍ 28നായിരുന്നു ഇരുവരുടെയും വിവാഹം നടന്നത്. ജാതകപൊരുത്തമില്ലാത്തതിന്റെ പേരില്‍ ആദ്യം വിവാഹം വേണ്ടെന്ന് വെച്ചിരുന്നു. എന്നാല്‍ രണ്ട് വര്‍ഷം കഴിഞ്ഞ് സുചിത്രയെ തന്നെ മോഹന്‍ലാല്‍ വിവാഹം കഴിക്കുകയായിരുന്നു. ഈ കഥ മോഹൻലാൽ തന്നെയാണ് ഒരു അഭിമുഖത്തിൽ വെളിപ്പെടുത്തിയിട്ടുണ്ട്.

മോഹന്‍ലാലിന്റെയും സുചിത്രയുടേയും വിവാഹ ജീവിതം മുപ്പതിലേക്ക് കടക്കുമ്പോള്‍ ഇത്തവണത്തെ വാര്‍ഷിക ദിനത്തില്‍ മറ്റൊരു സന്തോഷവും ഈ താരദമ്പതികള്‍ക്കുണ്ട്. ബാലതാരമായി പ്രേക്ഷകരെ വിസ്മയിപ്പിച്ച പ്രണവ് നായകനായി മാറിയതും ആദിക്ക് ലഭിച്ച സ്വീകാര്യതയും, അതിന് പിന്നാലെ പുതിയ സിനിമ ഏറ്റെടുത്തതുമൊക്കെ സന്തോഷം വര്‍ധിപ്പിക്കുന്നുണ്ട്.



വിവാഹ വാര്‍ഷികം മോഹന്‍ലാല്‍ ഷാംപെയ്‍ന്‍ പൊട്ടിച്ചാണ് ആഘോഷിച്ചത്. ഇതിന്‍റെ വീഡിയോ ദൃശ്യങ്ങള്‍ മോഹന്‍ലാലിന്‍റെ ആരാധകരുടെ ഫേസ്‍ബുക്ക് പേജുകളില്‍ അപ്‍ലോഡ് ചെയ്‍തിരുന്നു.