ഭാര്യക്കൊപ്പം ലണ്ടനിൽ പിറന്നാൾ ആഘോഷിച്ച് ലാലേട്ടൻ

ഇന്നലെയായിരുന്നു മലയാളത്തിന്‍റെ സൂപ്പർ സ്റ്റാർ മോഹൻലാലിന്‍റെ 53ാം പിറന്നാൾ. ഭാര്യ സുചിത്രയ്ക്കൊപ്പം ലണ്ടനിലായിരുന്നു താരത്തിന്‍റെ ഇത്തവണത്തെ പിറന്നാൾ ആഘോഷം. ഭാര്യക്കൊപ്പം പിറന്നാൾ ആഘോഷിക്കുന്ന ലാലേട്ടന്‍റെ വീഡിയോ ഇപ്പോൾ സാമൂഹ്യമാധ്യമങ്ങളിൽ വൈറലാവുകയാണ്. താരം തന്നെയാണ് പിറന്നാൾ ആഘോഷത്തിന്‍റെ ചിത്രവും വീഡിയോയും ഫേസ്ബുക്കിൽ പങ്കുവച്ചത്. ഒപ്പം ഫേസ്ബുക്കിലൂടെ പിറന്നാൾ ആശംസകൾക്ക് നന്ദി അറിയിക്കുകയും ചെയ്തു.




''പിറന്നാൾ ആശംസകൾക്ക് ഹൃദയം നിറഞ്ഞ നന്ദി. മുന്നിലൊരു നല്ല വർഷമായിരിക്കുമെന്ന് ഉറപ്പുണ്ട്. നിങ്ങൾക്കും നിങ്ങളുടെ കുടുംബങ്ങൾക്കും ദീർഘായുസ്സും സന്തോഷവുമുണ്ടാവാൻ ഞാന്‍ പ്രാർത്ഥിക്കുന്നു...'' എന്ന് ലാലേട്ടൻ ഫേസ്ബുക്കിൽ കുറിച്ചു. പിറന്നാൾ ദിനത്തിൽ ലാലേട്ടന് ആശംസകൾ അർപ്പിച്ച് സിനിമയ്ക്ക് അകത്തുനിന്നും പുറത്തുനിന്നുമായി നിരവധിപേർ എത്തിയിരുന്നു.

''ഹാപ്പി ബെർത്ത് ഡേ ഡിയർ ലാൽ'' എന്നായിരുന്നു മമ്മൂട്ടിയുടെ ആശംസ.''മലയാള സിനിമയുടെ ഹൃദയം കവർന്ന കൊച്ചുണ്ണിക്ക് എന്‍റെ ഒരായിരം ജന്മദിനാശംസകള്‍'' എന്നായിരുന്നു സുരേഷ് ഗോപി ആശംസിച്ചത്. ''പ്രചോദനമേകിയ ഇന്ത്യയിലെ തന്നെ മികച്ച താരത്തിന് പിറന്നാൾ ആശംസകൾ'' എന്നായിരുന്നു നിവിൻ ഫേസ്ബുക്കിൽ കുറിച്ചത്. മലയാള സിനിമയുടെ തമ്പുരാണ് പിറന്നാൾ ആശംസകളെന്ന് ജയറാമും ആശംസിച്ചു. ലാലേട്ടന് ഒത്തിരി സ്നേഹത്തോടെ ഒരായിരം ജന്മദിനാശംസകൾ എന്നായിരുന്നു സുരാജിന്‍റെ ആശംസ.




ഒടിയനിൽ നിന്നുള്ള അപൂർവ്വ ചിത്രം പങ്കുവെച്ചാണ് പീറ്റർ ഹെയ്ൻ പിറന്നാൾ ആശംസിച്ചത്. പൃഥ്വിരാജിന്‍റെ പിറന്നാൾ ആശംസ അൽപം വ്യത്യസ്തമായിരുന്നു. എൽ എന്ന ഇംഗ്ലീഷ് അക്ഷരം കൊണ്ടാണ് പൃഥ്വി ആശംസകൾ അറിയിച്ചത്. ലാലേട്ടന്‍റെ ആദ്യത്തെ അക്ഷരവും ലൂസിഫറിന്‍റെ ആദ്യത്തെ അക്ഷരവും ചേർന്നുള്ള പൃഥ്വിയുടെ ആശംസ വളരെ വ്യത്യസ്തമായിരുന്നു. പ്രിയദർശൻ, ജൂനിയർ എൻടിആർ, ടൊവിനോ തോമസ്, ഗോകുൽ സുരേഷ്, സണ്ണി വെയ്ൻ, ജയസൂര്യ തുടങ്ങിയ താര നിരകളും ആശംസകൾ അർപ്പിച്ചിരുന്നു.