രാജകീയ വരവ്! മോഹൻലാലിന്‍റെ മാസ് എൻട്രിക്ക് പിന്നിൽ

പശ്ചാത്തലത്തിൽ 'ലൂസിഫറി'ലെ ബിജിഎം. മെല്ലെയെത്തുന്ന കെഎൽ 07 സിയു 2020 നമ്പറിലുള്ള ടൊയോട്ടയുടെ അത്യാംഡബര മോഡലായ വെൽഫെയർ. കാറിൽ നിന്ന് ഇറങ്ങി തന്‍റെ കറുത്ത മാസ്കൂരി ചുറ്റും നിൽക്കുന്നവരെ അഭിവാദ്യം ചെയ്ത് ഒരു രാജകീയ വരവ്. പറഞ്ഞു വരുന്നത് സോഷ്യൽമീഡിയയിൽ ട്രെൻഡിംഗാകുന്ന നടൻ മോഹൻലാലിന്‍റെ ഒരു വീഡിയോയെ കുറിച്ചാണ്. വരുന്നത് രാജാവാകുമ്പോള്‍ വരവ് തന്നെ രാജകീയമാകും എന്ന് കുറിച്ചുകൊണ്ടാണ് മോഹൻലാൽ ഫാൻസ് ഗ്രൂപ്പുകളിൽ വീഡിയോ പ്രചരിക്കുനനത്.

Also Read: 'ലാഭനഷ്ടങ്ങളെക്കാളും വലുതാണ് എംടി സാറിന്റെ അനുഗ്രഹവും സ്‌നേഹവും; രണ്ടാമൂഴം തിരക്കഥ തിരിച്ചേല്‍പ്പിച്ചു': വി എ ശ്രീകുമാര്‍

7 വർഷങ്ങൾക്കിപ്പുറം ജീത്തു ജോസഫ് ദൃശ്യം രണ്ടാം ഭാഗം ഒരുക്കുന്നതായി വാര്‍ത്തകള്‍ വന്നിരുന്നു. കുറച്ച് ദിവസങ്ങള്‍ക്ക് മുമ്പാണ് കൊച്ചിയിൽ സിനിമയുടെ ചിത്രീകരണം കൊവിഡ് മാനദണ്ഡങ്ങള്‍ പാലിച്ച് ആരംഭിച്ചത്. ജോർജുകുട്ടിയുടേയും കുടുംബത്തിന്‍റേയും പുത്തൻ ചിത്രങ്ങള്‍ സോഷ്യൽമീഡിയയിൽ പ്രചരിക്കുന്നുണ്ട്. അതിന് പിന്നാലെയാണ് ലൊക്കേഷനിലേക്ക് മോഹൻലാൽ എത്തുന്ന ഈ വീഡിയോയും വൈറലായിരിക്കുന്നത്.

വൈറലാകുന്ന വീഡിയോ കാണാം

കൊച്ചിയിൽ ചിത്രത്തിന്‍റെ ഷെഡ്യൂള്‍ പൂര്‍ത്തിയാക്കി കഴിഞ്ഞ ദിവസം തൊടുപുഴ ഷെഡ്യൂളിലേക്ക് ദൃശ്യം 2 കടന്നിരുന്നു. തൊടുപുഴയിൽ വഴിത്തല സ്വദേശി മഠത്തിപ്പറമ്പില്‍ ജോസഫിന്‍റെ വീട്ടിലാണ് ഷൂട്ട്. ദൃശ്യം ആദ്യഭാഗത്തിൽ ജോര്‍ജ്ജുകുട്ടിയുടെ വീടായിരുന്ന സ്ഥലമാണിത്. അവിടേക്ക് മോഹൻലാൽ ഷൂട്ടിനായി എത്തിച്ചേരുന്നതാണ് ഈ വീഡിയോയെന്നാണ് സൂചന.

Also Read: 'രാവൺ' ഒരുക്കി ശ്രദ്ധേയനായ ആദർശ് കുമാർ ഒരുക്കുന്ന ആദ്യ സിനിമ ഒരുങ്ങുന്നു

മോഹൻലാൽ ധരിച്ചിരിക്കുന്ന ഷര്‍ട്ടിന്‍റെ വിലയും ചിലര്‍ വീഡിയോയ്ക്ക് താഴെ കമന്‍റ് ചെയ്തിട്ടുണ്ട്. റോയൽ ഓഷ്യന്‍റെ പോള്‍ ആൻഡ് ഷാര്‍ക്ക് യാച്ചിംഗ് മെൻസ് ലോങ് ടീഷര്‍ട്ടിന് 18,367 രൂപയാണ് ഓൺലൈനിൽ കാണിച്ചിരിക്കുന്ന വിലയെന്നാണ് ചിലര്‍ കമന്‍റിട്ടിട്ടുള്ളത്. വീഡിയോയ്ക്ക് താഴെ ലാലിനെ ട്രോളിയും ചിലര്‍ എത്തിയിട്ടുണ്ട്. കാറിൽ മാസ്ക് വെച്ചിരുന്നയാള്‍ പുറത്തിറങ്ങിയപ്പോള്‍ മാസ്കൂരിയോ, എജ്ജാതി മാസ് എന്നാണ് ചിലര്‍ ട്രോളിയിട്ടുള്ളത്.

ചിത്രങ്ങൾ, വീഡിയോ കടപ്പാട് - Mohanlal Fans Club Page

Also Watch :