വിമർശനങ്ങൾക്കെതിരെ ആഞ്ഞടിച്ച് നമിത പ്രമോദ്

നമിത പ്രമോദിന്‍റെ വളർത്തു നായയുടെ പിറന്നാൾ ആഘോഷ ചിത്രങ്ങൾ സാമൂഹ്യമാധ്യമങ്ങളിൽ വൈറലാവുകയാണ്. കേക്ക് മുറിച്ച് കുടുംബാംഗങ്ങൾക്കൊപ്പം പട്ടിക്കുട്ടിയുടെ പിറന്നാൾ ആഘോഷിക്കുന്ന ചിത്രങ്ങളാണ് താരം സാമൂഹ്യ മാധ്യമങ്ങളിൽ പങ്കുവച്ചത്. തുടർന്നാകട്ടെ കടുത്ത വിമർശനങ്ങൾ താരത്തിന് നേരിടേണ്ടി വന്നു.

'പാവപ്പെട്ട കുറേപേർ ഭക്ഷണമില്ലാതെ കഴിയുന്നത് പുറത്തിറങ്ങിയാൽ കാണാം. ആരാന്‍റെ പണം കൈയിലുള്ളതിന്‍റെ അഹങ്കാരമാണിതെന്നും' ചിലർ അഭിപ്രായപ്പെട്ടു. 'പണക്കൊഴുപ്പിന്‍റെ അഹങ്കാരം കുറച്ചുകഴിഞ്ഞാൽ മാറിക്കോളും, ഇപ്പോൾ തന്നെ സിനിമയിൽ അവസരമില്ല' എന്നും ചിലർ കുറ്റപ്പെടുത്തി. ഈ വിമർശനങ്ങൾക്ക് താരം കടുത്ത മറുപടി നൽകുക തന്നെ ചെയ്തു.



‘ഒന്നു പുറത്തോട്ടു ഇറങ്ങി നോക്ക്...ഒരു നേരത്തെ ഭക്ഷണം കഴിക്കാൻ പോലും നിവർത്തിയില്ലാത്ത എത്രയോ പാവങ്ങൾ കിടപ്പുണ്ട്. അവർക്ക് വല്ലതും കൊടുക്ക്...എന്നിട്ട് വീഡിയോ എടുത്ത് ഇട്ടോ...നമ്മൾ ലൈക്ക് അടിക്കാം’എന്ന കമന്‍റിന് താഴെയായാണ് താരം തുറന്നടിച്ചത്.

'ചാരിറ്റി നടത്താനും പാവപ്പെട്ടവരെ സംരക്ഷിക്കാനും തനിക്കറിയാം. അങ്ങനെയുള്ള ചിത്രങ്ങൾ സാമൂഹ്യ മാധ്യമങ്ങളിൽ പ്രചരിപ്പിക്കേണ്ട കാര്യമില്ല. നാലാൾക്കാരെ കൊട്ടിഘോഷിച്ച് അറിയിക്കേണ്ട ആവശ്യവും തനിക്കില്ല. മൃഗങ്ങളെ തനിക്ക് ഒരുപാട് ഇഷ്ടമാണ്. പോപ്പോ കുടുംബത്തിലെ ഏറ്റവും ചെറിയ അംഗമാണ്. മനുഷ്യർ മാത്രമല്ല ഈ ലോകത്തുള്ളത്. കണ്ണു തുറന്നു നോക്കൂ...'എന്നാണ് നമിത നൽകിയ മറുപടി.