ആ സംഭവങ്ങൾ തുട‍ര്‍ച്ചയായി; നയൻതാര പ്രതിഫലം കുറയ്ക്കുന്നു

തെന്നിന്ത്യൻ ലേഡി സൂപ്പർസ്റ്റാര്‍ നയൻതാര പ്രതിഫലം കുറയ്ക്കുന്നെന്ന് റിപ്പോര്‍ട്ട്. അടുത്തിടെയായി താരത്തിൻ്റേതായി തീയേറ്ററുകളിലെത്തുന്ന ചിത്രങ്ങൾ വേണ്ടത്ര വിജയം കൊയ്യാത്തതാണ് നയൻതാരയെ ഈ പുതിയ തീരുമാനത്തിലേക്ക് നയിച്ചതെന്നാണ് വിവരം. അടുത്തിടെയായി പുറത്തിറങ്ങുന്ന സിനിമകളൊന്നും വിചാരിച്ച അത്രത്തോളം വിജയം കൈവരിക്കാതെ പോയത് താരത്തെ അസ്വസ്ഥതപെടുത്തിയെന്നാണ് അണിയറ സംസാരം.

ഓരോ സിനിമ തോറും ഉയരുന്ന മൂല്യവും മികച്ച ആരാധക പിന്തുണയുമായിരുന്നു നയൻസിനെ ലേഡി സൂപ്പര്‍ സ്റ്റാറാക്കി മാറ്റിയത്. എന്നാല്‍ അടുത്തിടെയായി നയൻസിന് ലഭിക്കുന്നത് അത്ര നല്ല അനുഭവമല്ല ഇതേത്തുടര്‍ന്ന് കടുത്ത മാനസിക സമ്മര്‍ദ്ദത്തിലായ നയന്‍സ് ചില ശക്തമായ തിരിച്ചുവരവിന് ഒരുങ്ങുകയാണെന്നും റിപ്പോര്‍ട്ടുണ്ട്. നിലവിൽ 6 കോടി രൂപ വരെയാണ് നയൻതാര വാങ്ങുന്ന പ്രതിഫലം.

താരത്തിന് ഇനി ലഭിക്കുന്നത് അഭിനയപ്രാധാന്യമുള്ള കഥാപാത്രത്തെയാണ് പ്രതിഫലം കുറയ്ക്കാന്‍ തയ്യാറാണെന്നും മികച്ച കഥയും തിരക്കഥയുമുണ്ടെങ്കില്‍ പ്രതിഫലത്തില്‍ കടുംപിടുത്തമില്ലെന്നും നയൻതാര തീരുമാനിച്ചു കഴിഞ്ഞെന്നാണ് കേൾക്കുന്നത്. ശിവകാര്‍ത്തികേയനൊപ്പം നയൻതാര അഭിനയിച്ച മിസ്റ്റര്‍ ലോക്കൽ ബോക്സോഫീസിൽ വൻ പരാജയമായിരുന്നു. ഇതെ തുടര്‍ന്ന് നയൻതാരയ്ക്കൊപ്പം അഭിനയിക്കില്ലെന്ന ശിവകാര്‍ത്തികേയൻ്റെ തീരുമാനം സോഷ്യൽ മീഡിയയിൽ വലിയ രീതിയിൽ ചര്‍ച്ചയായിരുന്നു.

6 കോടി രൂപയാണ് നയൻതാര സേറാ നരസിംഹ റെഡ്ഡിയില്‍ അഭിനയിക്കുന്നതിനായി പ്രതിഫലമായി വാങ്ങിയത്. തെന്നിന്ത്യന്‍ നായികമാര്‍ക്ക് ലഭിക്കുന്ന പ്രതിഫലത്തുകയിൽ ഏറ്റവും വലിയ തുകയാണ് നയൻതാര വാങ്ങുന്നത്. രജനികാന്ത് നായകനാകുന്ന ദര്‍ബാറിലാണ് നയൻതാര ഇപ്പോൾ അഭിനയിച്ചുവരുന്നത്. ഒരു വലിയ ഇടവേളയ്ക്ക് ശേഷം നയൻതാര മലയാളത്തിലും അഭിനയിക്കുകയാണിപ്പോൾ. ധ്യാൻ ശ്രീനിവാസൻ ആദ്യമായി സംവിധാനം ചെയ്യുന്ന ലവ് ആക്ഷൻ ഡ്രാമ എന്ന ചിത്രത്തിലാണ് നയൻതാര അഭിനയിക്കുന്നത്. ധ്യാന്‍ ശ്രീനിവാസൻ ആദ്യമായി സംവിധാനം ചെയ്യുന്ന ചിത്രത്തില്‍ നിവിന്‍ പോളിയാണ് നായകൻ. അജു വര്‍ഗീസാണ് ചിത്രം നിര്‍മ്മിക്കുന്നത്.

'കൊലൈയുതിർ കാല'മാണ് നയൻതാരയുടേതായി തീയേറ്ററുകളിൽ പ്രദർശിപ്പിക്കുന്ന പുതിയ ചിത്രം.