ഫഹദിന്‍റെ 'ട്രാൻസി'ൽ നസ്രിയയും?; വാസ്തവമിതാണ്

'ബാംഗ്ലൂര്‍ ഡെയ്സി'നു ശേഷം ഫഹദ് ഫാസിലും നസ്രിയയും വെള്ളിത്തിരയിൽ ഇനി എന്നാണ് ഒന്നിക്കുക എന്ന ആകാംക്ഷയിലാണ് മലയാളി പ്രേക്ഷകര്‍. വിവാഹ ശേഷം സിനിമാമേഖലയോട് അൽപം അകലം പാലിച്ചിരുന്ന നസ്രിയ അടുത്തിടെയാണ് പുതിയ ചിത്രത്തൽ അഭിനയിച്ച് തുടങ്ങിയത്. അതിനോടൊപ്പം തന്നെ ഫഹദ് നായകനാകുന്ന ട്രാൻസ് എന്ന അൻവര്‍ റഷീദ് ചിത്രത്തില്‍ നസ്രിയയും ഉണ്ടാകുമെന്ന തരത്തിലും വാര്‍ത്തകൾ പ്രചരിച്ചു. ഫഹദിന്‍റെ ജോഡിയായി തന്നെയാണ് നസ്രിയ ചിത്രത്തിലെത്തുന്നതെന്നും റിപ്പോര്‍ട്ടുകളുണ്ടായിരുന്നു. എന്നാൽ ഈ വാര്‍ത്ത തീര്‍ത്തും അടിസ്ഥാനരഹിതമാണെന്നാണ് ട്രാൻസുമായി ഏറെ അടുത്ത വൃത്തങ്ങൾ വ്യക്തമാക്കുന്നത്.

ചിത്രത്തിൽ ഇതുവരെയും ഒരു നടിയെ നിശ്ചയിച്ചിട്ടില്ലെന്നും ഇനി ചിത്രത്തിന്‍റെ ഒരു ഷെഡ്യൂൾ കൂടി മാത്രമേ പൂര്‍ത്തിയാക്കാനായുള്ളൂ. ഇതുവരെ പൂര്‍ത്തിയാക്കിയ ഷെഡ്യുളുകളിൽ നടിമാരില്ലായിരുന്നെന്നും ഇതുവരെ അത്തരത്തിലൊരു നടിയെയും പരിഗണിക്കുന്നതായി ചര്‍ച്ചകളുണ്ടായിട്ടില്ലെന്നുമാണ് റിപ്പോര്‍ട്ടിൽ സൂചിപ്പിക്കുന്നത്. എന്നാൽ നിലവിലെ പദ്ധതി പിന്നീട് മാറില്ലെന്ന് ഉറപ്പില്ലെന്നും റിപ്പോര്‍ട്ട് പറഞ്ഞുവെക്കുന്നു. അമൽ നിരദ് ശൈലിയിൽ ഒരുങ്ങുന്ന ഒരു വേറിട്ട ചിത്രമായിരിക്കും ട്രാൻസെന്നും ചിത്രത്തിൽ ഹൃദയഹാരിയായ ഒരു പുരോഹിതനായാണ് ഫഹദ് പ്രത്യക്ഷപ്പെടുന്നതെന്നുമാണ് സ്ഥിരീകരിക്കാത്ത റിപ്പോര്‍ട്ടുകൾ.