അമ്മയോട് മാപ്പ് പറയാന്‍ ഒരുക്കമല്ലെന്ന് രമ്യാ നമ്പീശന്‍

കൊച്ചി: താരസംഘടനയായ അമ്മയിലേക്ക് മാപ്പ് പറഞ്ഞ് തിരിച്ചുവരാന്‍ തയ്യാറല്ലെന്ന് ഡബ്ല്യു.സി.സി അംഗം രമ്യാ നമ്പീശന്‍. അമ്മയിലേക്ക് ഇനിയില്ല. സംഘടനയ്ക്ക് പുറത്ത് നിന്ന് പ്രതികരിക്കാനാണ് തീരുമാനമെന്നും രമ്യാ നമ്പീശന്‍ വ്യക്തമാക്കി. മാപ്പ് പറഞ്ഞാല്‍ തിരിച്ചെടുക്കാമെന്ന അമ്മയുടെ നിലപാടിനോട് പ്രതികരിക്കുകയായിരുന്നു രമ്യ. ഏഷ്യാനെറ്റ് ന്യൂസിലാണ് രമ്യയുടെ പ്രതികരണം.

ഡബ്ല്യു.സി.സിക്ക് മറുപടിയുമായി അമ്മ സെക്രട്ടറി സിദ്ദീക്കും മുതിര്‍ന്ന നടി കെപിഎസി ലളിതയും നടത്തിയ വാര്‍ത്താസമ്മേളനത്തെയും രമ്യാ നമ്പീശന്‍ രൂക്ഷമായി വിമര്‍ശിച്ചു. കെപിഎസി ലളിതയുടെ നിലപാട് സ്ത്രീവിരുദ്ധമാണെന്ന് രമ്യ പറഞ്ഞു. സംഘടനയില്‍ നിന്ന് രാജി വെച്ചവര്‍ തിരിച്ചുവന്ന് മാപ്പ് പറഞ്ഞ് തെറ്റ് ഏറ്റുപറഞ്ഞാല്‍ തിരിച്ചെടുക്കാമെന്നായിരുന്നു ലളിതയുടെ പ്രസ്താവന. എന്നാല്‍ മാപ്പ് പറയില്ലെന്ന് രമ്യ നമ്പീശന്‍ തുറന്നടിക്കുകയായിരുന്നു.