പാചകകലയിൽ വൈദഗ്ദ്ധ്യം തെളിയിച്ച് നിമിഷ

നടി അനുശ്രീ ലൊക്കേഷനിൽ ദോശ ചുടുന്ന വീഡിയോ അടുത്തിടെ സാമൂഹ്യമാധ്യമങ്ങളിൽ വൈറലായിരുന്നു. പഞ്ചവർണതത്ത എന്ന ചിത്രത്തിന്‍റെ ലൊക്കേഷനിൽ നിന്നുള്ള വീഡിയോ ആയിരുന്നു അത്. ഒറ്റനിൽപ്പിൽ മുപ്പതോളം ദോശയായിരുന്നുവത്രെ അനുശ്രീ ചുട്ടെടുത്തത്. ഇപ്പോഴിതാ പുതുമുഖ നായിക നിമിഷ സജയനും പാചകകലയിൽ വൈദഗ്ദ്ധ്യം തെളിയിച്ച് എത്തിയിരിക്കുകയാണ്.

ദോശയ്ക്ക് പകരം പൊറോട്ടയാണ് നിമിഷ പരീക്ഷിച്ചത്. എണ്ണയൊക്കെ പുരട്ടി കൈകൊണ്ട് പൊറോട്ട പരത്തിയെടുക്കുന്ന വീഡിയോ ഇപ്പോൾ ആരാധകർ ഏറ്റെടുത്തിരിക്കുകയാണ്. 'കൈ പൊള്ളല്ലേ നിമിഷ' എന്നാരോ വിളിച്ചു പറയുന്നുണ്ട്. 'ഇല്ലില്ല, പൊള്ളില്ല' എന്ന മറുപടിയും നിമിഷ നൽകുന്നുണ്ട്.



ദിലീഷ് പോത്തന്‍റെ തൊണ്ടി മുതലും ദൃക്സാക്ഷിയും എന്ന ചിത്രത്തിലൂടെ സ്വതസിദ്ധമായ അഭിനയം കാഴ്ചവെച്ച് പ്രേക്ഷക ഹൃദയം കീഴടക്കിയ താരമാണ് നിമിഷ. തുടർന്ന് ഈടയിലും നായികയായി എത്തി. ടൊവിനോ നായകനാകുന്ന മധുപാൽ ചിത്രം കുപ്രസിദ്ധ പയ്യൻ, കുഞ്ചാക്കോ നായകനാകുന്ന സൗ സദാനന്ദന്‍റെ ചിത്രം എന്നിവയാണ് നിമിഷയുടെ പുതിയ ചിത്രങ്ങൾ.