മലയാള സിനിമയിലെ പുത്തൻ താരോദയമായി നിരഞ്ജന

'ദേവാസുരം' സിനിമയ്ക്ക് കാരണമായ മുല്ലശ്ശേരി രാജുവിന്റെ പേരക്കുട്ടി. അതുമാത്രം മതി നിരഞ്ജന എന്ന പുതുമുഖ നടിയുടെ സിനിമാപാരമ്പര്യമറിയാൻ. അമ്മ നാരായണി അറിയപ്പെടുന്ന നര്‍ത്തകിയാണ്. കലാപാരമ്പര്യമുള്ള കുടുംബത്തില്‍ നിന്നായതിനാൽ തന്നെ സിനിമയിലെത്തിയതിൽ അതിശയോക്തിയില്ല. മോഹന്‍ലാല്‍ ചിത്രമായ ലോഹത്തിലൂടെയാണ് നിരഞ്ജന സിനിമയിലേക്ക് കടന്നുവന്നത്. മലയാളികളുടെ പ്രിയപ്പെട്ട അഭിനേത്രിമാരായ അമലയ്ക്കും മഞ്ജു വാര്യര്‍ക്കുമൊപ്പം അഭിനയിച്ച 'കെയര്‍ ഓഫ് സൈറാബാനു' മികച്ച പ്രതികരണവുമായി നിറഞ്ഞ സദസ്സുകളില്‍ പ്രദര്‍ശനം തുടരുകയാണ്.

പ്ലസ് ടു വിദ്യാര്‍ത്ഥിനിയായ നിരഞ്ജനയ്ക്ക് ഇത് പരീക്ഷാക്കാലമാണ്. പഠനത്തിനിടയില്‍ ആണെങ്കിലും ഇഷ്ടതാരങ്ങള്‍ക്കൊപ്പം അഭിനയിക്കാന്‍ കഴിഞ്ഞതിന്റെ ത്രില്ലില്‍ കൂടിയാണ് ഈ അഭിനേത്രി. സിനിമയില്‍ നിന്നും നിരവധി ഓഫറുകള്‍ ലഭിക്കുന്നതിൽ ഏറെ സന്തോഷവതിയുമാണ് നിര‌‌‌ഞ്ജന.

നിരഞ്ജനയുടെ അമ്മയുടെ അടുത്ത കൂട്ടുകാരിയാണ് മഞ്ജു വാര്യര്‍. എനിക്ക് സെക്കന്‍ഡ് മദര്‍ എന്നോ പാര്‍ട്ണര്‍ ഇന്‍ ക്രൈം എന്നൊക്കെയോ മേമയെ വിളിക്കാമെന്നാണ് നിരഞ്ജന പറയുന്നത്. അത്രയ്ക്ക് അടുത്ത ബന്ധമാണ് മഞ്ജുവുമായുള്ളതെന്ന് നിരഞ്ജന 'മാതൃഭൂമി'ക്കായി അനുവദിച്ച അഭിമുഖത്തിൽ പറയുന്നു.

Niranjana new heroine for malayalam film
Newbie Niranjana Anoop have more films waiting in M-Town.