ചെറുചിരിയോടെ ചാറ്റ് ചെയ്യുന്ന തൃഷയെ ലൈവായി ട്രോളി നിവിൻ

നിവിൻ പോളിയും തെന്നിന്ത്യൻ നടി തൃഷയും മുഖ്യവേഷങ്ങൾ കൈകാര്യം ചെയ്യുന്ന 'ഹേയ് ജൂഡി'ന്‍റെ ചിത്രീകരണവേളയിലെ രസകരമായ മുഹൂര്‍ത്തങ്ങളടങ്ങുന്ന ലൈവ് വീഡിയോ ശ്രദ്ധേയമാകുന്നു. മൈസൂരുവിലെ കടലോരത്ത് നടക്കുന്ന ഷൂട്ടിങ്ങിനിടയിലെ ഒരു രസകരമായ സംഭവമാണ് ഇപ്പോൾ ശ്രദ്ധേയമാകുന്നത്. നിവിന്‍ പോളി ഒപ്പിച്ച ഒരു ചെറിയ കുസൃതിയാണ് വീഡിയോയുടെ ഹൈലൈറ്റ്.




ചിത്രത്തിന്‍റെ അവസാനവട്ട ചിത്രീകരണങ്ങള്‍ പുരോഗമിക്കുകയാണ്. ശ്വാമപ്രസാദ് സംവിധാനം ചെയ്യുന്ന ചിത്രത്തിന്‍റെ ക്യാമറാമാൻ ഗിരീഷ് ഗംഗാധരനും ചേര്‍ന്ന് ഷോട്ട് പ്ലാന്‍ ചര്‍ച്ച ചെയ്യുന്നതിനിടെയാണ് നിവിൻ ​ ഈ കുസൃതി ഒപ്പിച്ചിരിക്കുന്നത്. ഇതിനിടെ കാസ്റ്റിങ് ഡയറക്ടര്‍ ഫേസ്ബുക്ക് ലൈവ് ചെയ്യാനാരംഭിച്ചു. തൃഷ മൊബൈലില്‍ മുഴുകിയിരിക്കുകയാണ്. നിവിനും അടുത്തുണ്ട്. ഉടൻ ലൈവ് ചെയ്തിരുന്ന കാസ്റ്റിങ് ഡയറക്ടറെ നിവിൻ രഹസ്യമായി അടുത്തേക്ക് വിളിച്ച് ക്യാമറയോട് രഹസ്യമായി പറഞ്ഞു, "തൃഷ ചിരിക്കുന്നത് കണ്ടോ, അവര്‍ ബോയ് ഫ്രണ്ടിന് മെസേജ് ചെയ്യുകയാണ്". രണ്ടു വട്ടം നിവിൻ ഈ കുസൃതി ആവര്‍ത്തിക്കുന്നു, ഇതിനോട് തൃഷ പുഞ്ചിരിയോടെയാണ് പ്രതികരിച്ചത്. ദയവ് ചെയ്ത് വീഡിയോ ഫെയ്‌സ്ബുക്കില്‍ ഇടരുതെന്ന് അവര്‍ അപേക്ഷിക്കുന്നു. എന്നാല്‍ ഇത് ഫേസ്ബുക്ക് ലൈവാണെന്ന് പറഞ്ഞതോടെ അവിടെ കൂട്ടച്ചിരി മുഴങ്ങി. ഐ ലവ് ഫേസ്ബുക്ക് എന്ന് പറഞ്ഞാണ് തൃഷ അമളി പറ്റിയ സാഹചര്യത്തിൽ പിടിച്ചു നിന്നത്.