കായംകുളം കൊച്ചുണ്ണിയുടെ ചിത്രീകരണത്തിനിടെ നിവിൻ പോളിക്ക് പരിക്ക്

നിവിൻ പോളി നായകനാകുന്ന ചിത്രം കായംകുളം കൊച്ചുണ്ണിയുടെ ചിത്രീകരണം പുരോഗമിച്ചു കൊണ്ടിരിക്കുകയാണ്. ചിത്രീകരണത്തിനടയ്ക്ക് താരത്തിന് പരിക്ക് പറ്റിയെന്ന വാർത്തയാണ് ഇപ്പോൾ പുറത്തുവന്നിരിക്കുന്നത്. പരിക്ക് സാരമുള്ളതാണെന്നും 15 ദിവസത്തോളം വിശ്രമം ആവശ്യമാണെന്നുമാണ് റിപ്പോർട്ട്.



ബ്രിട്ടീഷ് പട്ടാളക്കാരുമായി കൊച്ചുണ്ണി ഏറ്റുമുട്ടുന്ന രംഗം ചിത്രീകരിക്കുമ്പോഴായിരുന്നു നിവിന് പരിക്കേറ്റത്. ഇടതുകൈക്ക് പരിക്കേറ്റിരുന്നെങ്കിലും ഇതു സാരമാക്കാതെ രണ്ട് ദിവസത്തോളം നിവിൻ ഷൂട്ടിങിന് എത്തിയിരുന്നു. പരിക്ക് ഭേദമാകാത്തതിനെ തുടർന്ന് വിശ്രമിക്കുന്നതിനായി ചെറിയൊരു ഇടവേളയെടുത്തിരിക്കുകയാണ് താരം.

ഗോകുലം ഗോപാലൻ നിർമ്മിക്കുന്ന ബിഗ് ബജറ്റ് ചിത്രമാണിത്. 15 കോടി ചെലവാണ് പ്രതീക്ഷിക്കുന്നത്. മംഗലാപുരത്ത് ചിത്രീകരണം തുടരുന്ന കായംകുളം കൊച്ചുണ്ണിയുടെ അടുത്ത ഭാഗം ശ്രീലങ്കയിലായിരിക്കും ഷൂട്ട് ചെയ്യുക.