ഖില്‍ജിയുടെ അടിമ മാലിക് കഫൂറിനെ എവിടുന്ന് കിട്ടി; രണ്‍വീര്‍ പറയുന്നു

സഞ്ജയ് ലീല ബന്‍സാലിയുടെ പദ്മാവത് തിയേറ്ററുകള്‍ നിറഞ്ഞോടുമ്പോള്‍ റാണി പദ്മാവതിയായി അഭിനയിച്ച ദീപിക പദുകോണും മേവാറിലെ രാജാവായ രത്തന്‍ സിങുമൊന്നുമല്ല പ്രേക്ഷകരുടെ മനസ്സില്‍ ഇടം നേടുന്നത്. അലാവുദ്ദീന്‍ ഖില്‍ജിയായി തകര്‍ത്താടിയ രണ്‍വീര്‍ സിങ് ആണ് .

ബോളിവുഡ് ഒന്നടങ്കം രണ്‍വീറിന്‍റെ പ്രകടനത്തെ വാനോളം പുകഴ്ത്തുകയാണ്. ഖില്‍ജിയുടെ അടിമയായ മാലിക് കഫൂറും പ്രേക്ഷകരുടെ മനസ്സിലിടം നേടിക്കഴിഞ്ഞു. ഇരുവരും തമ്മിലുളള അതി ഗംഭീര കെമിസ്ട്രി ചിത്രത്തിന് മുതല്‍ക്കൂട്ടായി.

അലാവുദ്ദീന്‍റെ മനസ്സറിഞ്ഞു പ്രവര്‍ത്തിക്കുന്ന മാലിക് തന്‍റെ ശരീര ഭാഷയിലും ആ കഥാപാത്രത്തെ അടിമുടി ആവാഹിച്ചിരുന്നു. മാലിക് ആയി അഭിനയിച്ച ജിം സാര്‍ബിനെ രണ്‍വീര്‍ തന്നെയാണ് ചിത്രത്തില്‍ കൊണ്ടുവന്നത്.

രാം മാധ് വാനി സംവിധാനം ചെയ്ത് സോനം കപൂര്‍ മുഖ്യവേഷത്തിലെത്തിയ നീര്‍ജയിലെ ജിം സാര്‍ബിന്‍റെ പ്രകടനം കണ്ടാണ് മാലിക് ആയി അഭിനയിക്കാന്‍ സാര്‍ബിനെ മതിയെന്ന് ബന്‍സാലിയോട് നിര്‍ദ്ദേശിച്ചതെന്നാണ് രണ്‍വീര്‍ പറയുന്നത്.