അന്ന് മമ്മൂട്ടിയോടൊപ്പം ഇന്ന് ദുൽഖറിനൊപ്പം; അദിതിയുടെ പ്രായം തെരഞ്ഞ് ആരാധകർ

2006 ൽ മമ്മൂട്ടിയുടെ നായികയായിട്ടായിരുന്നു അദിതിയുടെ മലയാള സിനിമയിലേക്കുള്ള അരങ്ങേറ്റം. രഞ്ജിത്ത് സംവിധാനം ചെയ്ത് മമ്മൂട്ടി നായകനായെത്തിയ 'പ്രജാപതി'യായിരുന്നു അദിതിയുടെ ആദ്യ മലയാളചിത്രം. "പ്രജാപതിയിൽ ഞാൻ നർത്തകി എന്ന നിലയിൽ വന്നു പോകുന്ന ചെറിയ ഒരു കഥാപാത്രം മാത്രമാണ് ചെയ്തിരുന്നത്. അതെന്റെ ആദ്യ സിനിമയാണെന്നോ സിനിമയിൽ ഞാൻ അഭിനയിച്ചുവെന്നോ പറയാൻ കഴിയില്ലെന്ന്" അദിതി ഒരിക്കൽ ഒരു പ്രമുഖ ചാനലിന് നൽകിയ അഭിമുഖത്തിൽ പറഞ്ഞിരുന്നു. സാവിത്രി എന്ന കഥാപാത്രമായാണ് അദിതി 'പ്രജാപതി'യിലെത്തിയത്.

മമ്മൂട്ടിക്കൊപ്പം അഭിനയിച്ച് പതിനാറ് വർഷങ്ങൾക്ക് ശേഷം മകൻ ദുൽഖർ സൽമാനൊപ്പവും അഭിനയിച്ചിരിക്കുകയാണ് അദിതിയിപ്പോൾ. അദിതിയും ദുൽഖർ സൽമാനും കാജലും ഒന്നിച്ചെത്തുന്ന 'ഹേയ് സിനാമിക' മാർച്ച് മൂന്നിനാണ് തീയേറ്ററുകളിലെത്തുക. ചിത്രത്തിൽ ദുൽഖറിന്റെ നായികയായതോടെ അച്ഛനൊപ്പവും മകനൊപ്പവും അഭിനയിച്ചു എന്ന അപൂർവ നേട്ടവും അദിതി സ്വന്തമാക്കിയിരിക്കുകയാണ്. ഇന്ത്യൻ സിനിമയിലെ പ്രശസ്ത നൃത്ത സംവിധായിക ആയ ബൃന്ദ മാസ്റ്റർ ആണ് 'ഹേയ് സിനാമിക' സംവിധാനം ചെയ്യുന്നത്.

പ്രജാപതിക്ക് മുൻപ് ശൃംഗാരം എന്നൊരു തമിഴ് ചിത്രത്തിലൂടെയായിരുന്നു അദിതി സിനിമയിലെത്തുന്നത്. എന്നാൽ ഈ ചിത്രം തീയേറ്ററിൽ റിലീസ് ചെയ്തത് 2007 ലായിരുന്നു. മനോജ് കെ. ജയനായിരുന്നു ശൃംഗാരത്തിൽ അദിതിയുടെ നായകൻ. മൂന്ന് ദേശീയ പുരസ്കാരങ്ങളും ചിത്രം നേടിയിരുന്നു. പിന്നീട് ബോളിവുഡിലടക്കം അദിതി സാന്നിധ്യമറിയിച്ചു.

ആദ്യ ചിത്രമായ ശൃംഗാരത്തിലെ രൂപത്തിൽ നിന്ന് അദിതിയ്ക്ക് കാര്യമായ മാറ്റങ്ങളൊന്നും സംഭവിച്ചിട്ടില്ല എന്നാണ് സോഷ്യൽ മീഡിയയുടെ മറ്റൊരു കണ്ടെത്തൽ. വിക്കീപീഡയയിലെ കണക്കുകൾ പ്രകാരം 35 വയസാണ് അദിതിയുടെ പ്രായം. എന്നാൽ ഇപ്പോഴും ഇരുപതു വയസുകാരിയെ പോലെ തന്നെയുണ്ടെന്നാണ് പലരും അദിതിയുടെ ചിത്രങ്ങൾക്ക് താഴേ കമന്റ് ചെയ്യുന്നത്.

നഷ്ടപ്രണയത്തിന്റെ കഥ പറഞ്ഞ സൂഫിയും സുജാതയുമായിരുന്നു അദിതിയ്ക്ക് മലയാളികളുടെ ഹൃദയത്തിൽ ഇടം നേടിക്കൊടുത്ത സിനിമ. ചിത്രത്തിലെ സുജാത എന്ന കഥാപാത്രം അത്രയേറെ ശ്രദ്ധിക്കപ്പെട്ടിരുന്നു. ചിത്രത്തിലെ അദിതിയുടെ ലുക്കും ആരാധകർ ഏറ്റെടുത്തിരുന്നു. ഇതിനോടകം തന്നെ മലയാളം, തെലുങ്ക്, തമിഴ്, ഹിന്ദി തുടങ്ങിയ ഭാഷകളിലെല്ലാം അദിതി അഭിനയിച്ചു കഴിഞ്ഞു.