നടി രേണു വീണ്ടും വിവാഹിതയാകുന്നു; ആശംസയുമായി പവൻ കല്യാൺ

പ്രണയവും വിവാഹവും വിവാഹത്തകർച്ചയുമെല്ലാം സിനിമാ ലോകത്ത് സർവ്വ സാധാരണമാണ്. വിവാഹമോചനം നേടിയാലും സെലിബ്രിറ്റികളിൽ പലരും നല്ല സുഹൃത്ത് ബന്ധം നിലനിർത്തുന്നവരുമാണ്. മുൻഭാര്യ രേണുവിന് നടൻ പവൻ കല്യാൺ വിവാഹ ആശംസകൾ അർപ്പിച്ച് കൊണ്ട് പങ്കുവെച്ച ട്വീറ്റ് ഇപ്പോൾ വൈറലായി മാറിയിരിക്കുകയാണ്. നടി രേണു ദേശായ് വീണ്ടും വിവാഹിതയാകുന്നു എന്ന വാർത്ത കഴിഞ്ഞ ദിവസമാണ് ടോളിവുഡ് മാധ്യമങ്ങളിൽ വന്നത്.

വരൻ ആരെന്ന് വ്യക്തമാക്കിയില്ലെങ്കിലും മോതിരമിടുന്ന ചിത്രം സാമൂഹ്യ മാധ്യമങ്ങളിൽ വൈറലായിരുന്നു. ''ജീവിതത്തിന്‍റെ പുതിയ ഘട്ടത്തിലേക്ക് കാലെടുത്ത് വയ്ക്കുന്ന രേണുവിന് ഹൃദയം നിറഞ്ഞ ആശംസകൾ. രേണുവിന് സന്തോഷവും ഐശ്വര്യവും സമാധാനവുമുണ്ടാകാൻ ദൈവത്തോട് പ്രാർത്ഥിക്കുന്നു'' എന്നാണ് പവൻ കല്യാൺ ട്വിറ്ററിൽ കുറിച്ചത്.

പവൻ കല്യാണിന്‍റെ രണ്ടാം ഭാര്യയാണ് രേണു. 2012 ൽ ഇരുവരും വേർപിരിഞ്ഞു. ആദ്യ ഭാര്യ നന്ദിനിയുമായുള്ള ബന്ധം വേർപെടുത്തിയ ശേഷമായിരുന്നു പവൻ രേണുവിനെ വിവാഹം കഴിച്ചത്. പവൻ മൂന്നാമതും വിവാഹിതനായി. റഷ്യൻ സ്വദേശി അന്ന ലെസ്നോവയാണ് മൂന്നാമത്തെ ഭാര്യ.