പ്രിയങ്കാചോപ്രയോട് പാക്കിസ്ഥാന് എന്തിനാണ് ദേഷ്യം?

വളരെക്കുറച്ച് ഇന്ത്യൻ താരങ്ങൾക്കേ ഇന്ത്യയ്ക്ക് പുറത്തും ആരാധകരുള്ളൂ. അത്തരത്തിലൊരു താരമാണ് പ്രിയങ്കാ ചോപ്ര. ബോളിവുഡിനപ്പുറം ഹോളിവുഡിലും ഏറെ ആരാധകരുള്ള താരമാണ് പിസി എന്ന പ്രിയങ്ക ചോപ്ര. അഭിനേതാവ് എന്നതിന് പുറമേ ഗായിക എന്ന നിലയിലും പ്രശസ്തയായ പ്രിയങ്ക യുനിസെഫിന്‍റെ ഗുഡ്‍വില്‍ അംബാസഡര്‍ കൂടിയാണ്.

ബാലാകോട്ട് അക്രമണത്തിന്‍റെ പശ്ചാത്തലത്തില്‍ പ്രിയങ്ക ഉൾപ്പടെ നിരവധി ബോളിവുഡ് താരങ്ങൾ ഇന്ത്യൻ സൈന്യത്തിന് പിന്തുണ പ്രഖ്യാപിച്ച് രംഗത്തെത്തിയിരുന്നു. പ്രിയങ്കയുടെ ഈ നീക്കത്തില്‍ രോഷം പൂണ്ട് പാക് പൗരന്മാര്‍ താരത്തെ അംബാസഡര്‍ പദവിയില്‍ നിന്ന് നീക്കം ചെയ്യണമെന്ന് ആവശ്യപ്പെട്ട് പരാതി സമര്‍പ്പിച്ചിരിക്കുകയാണ്.




ഇന്ത്യയും പാക്കിസ്ഥാനും പോലുള്ള വൻ ആണവ ശക്തികൾ തമ്മില്‍ ഏറ്റുമുട്ടിയാല്‍ ഉണ്ടാവാന്‍ സാധ്യതയുള്ള നാശനഷ്ടങ്ങൾ കണക്കിലെടുത്ത് കുറേക്കൂടി സംയമനത്തോടെ താരം അഭിപ്രായപ്രകടനം നടത്തേണ്ടിയിരുന്നു എന്നാണ് പരാതിക്കാര്‍ പറയുന്നത്.



ഇരു രാജ്യങ്ങളുടേയും പക്ഷത്ത് നില്‍ക്കാതെ രണ്ട് രാജ്യങ്ങളും തമ്മിലുള്ള സമാധാനം നിലനിര്‍ത്തേണ്ട താരം പകരം സ്വന്തം രാജ്യത്തിന്‍റെ സൈന്യത്തെ പിന്തുണച്ചത് ഏകപക്ഷീയമാണെന്നും അതിനാല്‍ത്തന്നെ ഗുഡ്‍വില്‍ അംബാസഡര്‍ പദവിക്ക് സ്വയം അയോഗ്യയാണെന്ന് തെളിയിച്ചിരിക്കുകയാണെന്നും പരാതിയില്‍ പറയുന്നു.