Sreelatha Died: ഗായകൻ ബിജു നാരായണന്‍റെ ഭാര്യ ശ്രീലത അന്തരിച്ചു

കൊച്ചി: സിനിമാ പിന്നണി ഗായകനായ ബിജു നാരായണന്‍റെ ഭാര്യ ശ്രീലത നാരായണന്‍ (46) അന്തരിച്ചു. ശവ സംസ്കാരം ചൊവ്വാഴ്ച രാത്രി 7.30ന് കളമശ്ശേരിയില്‍ വെച്ച് നടക്കും. എറണാകുളം ചേരാനല്ലൂര്‍ സ്വദേശിയായ ശ്രീലത മഹാരാജാസ് കോളജില്‍ ബിജു നാരായണന്‍റെ സഹപാഠിയായിരുന്നു. 1998 ജനുവരി 23–നാണ് ബിജുവും ശ്രീലതയും തമ്മിൽ വിവാഹിതരായത്. ഭൗതിക ശരീരം ഇടപ്പള്ളി കുന്നുംപുറം ശ്രീലകത്ത് വീട്ടിലാണുള്ളത്.

അര്‍ബുദത്തെതുടര്‍ന്ന് ഏറെ നാളായി ചികിത്സയിലായിരുന്നു. ഇവര്‍ക്ക് സിദ്ധാര്‍ത്ഥ്, സൂര്യ എന്നീ രണ്ട് മക്കളുണ്ട്. മലയാളത്തിലെ പ്രശസ്തനായ പിന്നണിഗായകനാണ് ബിജു നാരായണന്‍. വെങ്കലം എന്ന ചിത്രത്തിലുള്ള പത്തുവെളുപ്പിന് എന്നു ഗാനമാണ് ബിജു നാരായണന്‍ ആദ്യമായി സിനിമയില്‍ ആലപിച്ചത്. ഇപ്പോള്‍ സിനിമാ പിന്നണി ഗാനരംഗത്ത് 400-ലധികം ഗാനങ്ങള്‍ ഇദ്ദേഹം ആലപിച്ചുകഴിഞ്ഞിട്ടുണ്ട്.