പ്രതികരിക്കുന്നവരെ നിശബ്ദരാക്കാൻ ശ്രമമെന്ന് ജോയ് മാത്യു

കോഴിക്കോട്: പ്രതികരിക്കുന്നവരെ നിശബ്ദരാക്കുകയെന്നത് എല്ലാ ഭരണകൂടവും ചെയ്യുന്നതാണെന്ന് നടൻ ജോയ് മാത്യു. തനിക്കെതിരായ കേസിൽ കോഴിക്കോട് ടൗൺ പോലീസ് സ്റ്റേഷനിൽ ഹാജരായ ശേഷം മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. തനിക്കെതിരെ കേസെടുത്തത് തന്നെ നിശബനാക്കാൻ വേണ്ടിയാണെന്നും അദ്ദേഹം പറഞ്ഞു.

ആരെയും തീവ്രവാദിയാക്കുന്ന കാലത്താണ് നമ്മൾ ജീവിക്കുന്നത്. എന്നാൽ അക്കാര്യത്തിൽ തനിക്കൊരു ഭയവുമില്ലെന്നും ജോയ് മാത്യു പറഞ്ഞു. കന്യാസ്ത്രീകളുടെ സമരത്തിന് പിന്തുണ പ്രഖ്യാപിച്ച് മിഠായിത്തെരുവിൽ പ്രകടനം നടത്തിയതിനാണ് ജോയ് മാത്യുവിനെതിരെ കേസെടുത്തത്.

മിഠായിത്തെരുവിൽ നിശബ്ദ പ്രകടനമാണ് നടന്നത്. പൊതുജനത്തിന് ഇതിൽ യാതൊരു തടസ്സവും ഉണ്ടായിട്ടില്ല. മിഠായിത്തെരുവിൽ പ്രകടനം പാടില്ലെന്ന് പ്രത്യേക നിയമമുള്ളതായി അറവില്ല. അവിടെ അത്തരത്തിൽ ബോർഡുകളൊന്നും ഇല്ലെന്നും ജോയ് മാത്യു ചൂണ്ടിക്കാട്ടി.