ഇവിടെ ആഘോഷം; അവിടെ മഞ്ഞു മലകയറ്റം

'ആദി' എന്ന സിനിമ എങ്ങും ആഘോഷമാവുകയാണ്. എന്നാൽ സിനിമയുടെ വിജയം പ്രണവ് മോഹൻലാൽ അറിയുന്നതും ആഘോഷിക്കുന്നതും ഹിമാലയത്തിലിരുന്നാണ്. കൂട്ടിന് ആരും ഇല്ലാതെ പ്രണവ് മഞ്ഞു മലകൾക്കിടയിലൂടെ നടക്കുന്ന വീഡിയോ സോഷ്യൽമീഡിയയിൽ തരംഗമാവുകയാണ്. മുംബൈയിൽ ഷൂട്ടിങ് ലൊക്കേഷനിലുള്ള മോഹൻലാലിനെയും കൊച്ചിയിലുള്ള അമ്മ സുചിത്രയെയും പ്രണവ് വിളിച്ചു. വേറെ ആരുമായും ബന്ധപ്പെട്ടില്ല. ആദി തീയറ്ററുകളിൽ ആവേശമാകുമ്പോൾ പ്രണവ് തന്‍റെ പതിവ് യാത്രകൾ മുടക്കുന്നില്ല.

പ്രണവ് ആർക്കൊപ്പവും സിനിമ കണ്ടിട്ടില്ല. ചിത്രം വിജയിച്ച വിവരം ആന്റണി പെരുമ്പാവൂര്‍ പ്രണവിനെ വിളിച്ചറിയിച്ചു. പ്രണവിന്‍റെ ഹിമാലയത്തിൽ നിന്നുള്ള ചിത്രങ്ങളും വീഡിയോയും സോഷ്യൽമീഡിയയിൽ ആരോ പങ്കുവെച്ചതോടെ പെട്ടെന്ന് വൈറലാവുകയായിരുന്നു. നാലാം തവണയാണ് തീർഥാടനമെന്ന പോലെ പ്രണവ് ഹിമാലയത്തിൽ പോകുന്നത്. ഇത്തവണയും തനിയെതന്നെയാണ്. മിക്കസമയവും കാൽനടയായാണ് യാത്ര. അപൂർവം മാത്രം വാഹനങ്ങളിൽ. സൗകര്യങ്ങൾ ഒന്നുമില്ലാതെ ചെറിയ സ്ഥലങ്ങളിൽ ക്യാംപു ചെയ്താണ് താമസം. ഏതായാലും നടനായാലും തന്‍റെ ശീലങ്ങളിൽ മാറ്റമുണ്ടാകില്ലെന്ന് പ്രണവ് തെളിയിച്ചുകഴിഞ്ഞു.