പുതിയ സിനിമയ്ക്കായ് പ്രണവ് പാർകൗർ പരീശീലനത്തിൽ

പ്രണവ് മോഹൻലാൽ ജീത്തു ജോസഫ് ചിത്രം തീരുമാനിച്ചപ്പോൾ മുതൽ തന്നെ ചിത്രത്തിന് വേണ്ടിയുള്ള കാത്തിരിപ്പ് ആരാധകർ തുടങ്ങിയിരുന്നു. അടുത്ത വർഷം തീയേറ്ററുകളിലെത്തുന്ന ചിത്രത്തിനെ കുറിച്ചുള്ള കൂടുതൽ വിവരങ്ങൾ പുറത്തുവരാനിരിക്കുന്നതേയുള്ളു. എന്താണേലും ഹോളിവുഡ് ആക്ഷൻ റിവഞ്ച് ത്രില്ലറുകളോട് കിടപിടിക്കുന്നതാവും പ്രണവിന്റെ അരങ്ങേറ്റ ചിത്രമെന്ന സൂചനയാണ് മോഹൻലാൽ നൽകുന്നത്.

നായകനാകുന്ന ആദ്യ ചിത്രത്തിന് വേണ്ടി പ്രണവ് മോഹൻലാൽ പാർകൗർ പഠിക്കുന്നതിന്‍റെ ആവേശത്തിലാണെന്ന് മോഹൻലാൽ പറഞ്ഞു.ടൈംസ് ഓഫ് ഇന്ത്യക്ക് നൽകിയ അഭിമുഖത്തിൽ സംസാരിക്കുകയായിരുന്നു മോഹൻലാൽ. ജിംനാസ്റ്റിക്ക്, സ്കൈഡൈവിങ്, റോക്ക് ക്ലൈമ്പിങ് എന്നിവയിൽ താൽപര്യമുള്ള പ്രണവിന് പാർകൗർ അഭ്യസിക്കുക എന്നത് പ്രയാസമേറിയ കാര്യമാകില്ല. തന്റെ അഭിരുചികൾക്ക് അനുയോജ്യമാണെന്ന് തോന്നിയതുകൊണ്ടാവാം പ്രണവ് ഈ ചിത്രം തെരഞ്ഞെടുക്കാൻ തീരുമാനിച്ചതെന്നും മോഹൻലാൽ പറഞ്ഞു.

മുന്നിലുള്ള കെട്ടിടങ്ങളും മതിലുകളും ചെറിയ തടസങ്ങളും ചാടിക്കടക്കാൻ അഭ്യസിക്കുന്ന ആക്രോബാറ്റിക്ക് സ്വഭാവമുള്ള ശാരീരികാഭ്യാസമാണ് പാർകൗർ. നിരവധി ഹോളിവുഡ് ആക്ഷൻ ചിത്രങ്ങളിൽ പാർകൗർ ഉപയോഗിച്ചുള്ള ആക്ഷൻ രംഗങ്ങളുണ്ട്. ഹോളിവുഡ് ആക്ഷൻ റിവഞ്ച് ത്രില്ലറുകളോട് കിടപിടിക്കുന്ന ചിത്രത്തിലൂടെയായിരിക്കും പ്രണവിന്റെ ആദ്യ ചിത്രമെന്ന് ഉറപ്പ്. ഒന്നാമൻ എന്ന ചിത്രത്തിൽ മോഹൻലാലിന്റെ കുട്ടിക്കാലം അവതരിപ്പിച്ചത് പ്രണവ് ആയിരുന്നു. ഒന്നാമനിലെ പ്രണവിന്റെ ചില ശാരീരിക അഭ്യാസ പ്രകടനങ്ങൾ ഏറെ ശ്രദ്ധിക്കപ്പെട്ടിരുന്നു. ബാലാതാരമായി രണ്ട് ചിത്രങ്ങളിൽ അഭിനയിച്ചിട്ടുള്ള പ്രണവ് ഒരു തവണ മികച്ച ബാലനടനുള്ള സംസ്ഥാന പുരസ്ക്കാരവും നേടിയിട്ടുണ്ട്.