'ഈ പറഞ്ഞത് ലോകത്തിൻ്റെ ഏതുകോണിൽ പോയി ഞാൻ ഷൂട്ട് ചെയ്യും'; എമ്പുരാൻ എഴുത്തുകാരൻ്റെ മടയിലെത്തിയ പൃഥ്വി ചോദിക്കുന്നു!

മലാളത്തിൻ്റെ അഭിമാനമായി മാറിയ ലൂസിഫര്‍ നേടിയ അത്യുജ്ജ്വല വിജയം ഇരുതാരങ്ങളുടെയും പ്രേക്ഷകരെ അത്യന്തം ആവേശത്തിലാഴ്ത്തിയിട്ടുണ്ട്. ചിത്രത്തെ കുറിച്ചുള്ള ഓരോ വിവരങ്ങൾക്കും ആരാധകര്‍ അത്രത്തോളം ആകാംക്ഷയോടെയാണ് കാത്തിരിക്കുന്നത്. ആരാധകരെ ആവേശം കൊള്ളിക്കുന്ന പുതിയൊരു വിവരമാണ് കഴിഞ്ഞ ദിവസം രാത്രി പൃഥ്വിരാജ് തൻ്റെ ഫേസ്ബുക്ക് പേജിലൂടെ പുറത്തു വിട്ടത്.

പൃഥ്വിരാജ് നടനും തിരക്കഥാകൃത്തുമായ മുരളി ഗോപിയെ വീട്ടിൽ പോയി കണ്ട് സംസാരിച്ചിരിക്കുകയാണ് ഇപ്പോൾ. അതിൻ്റെ വിവരമാണ് പൃഥ്വിരാജ് ആരാധകരുമായി പങ്കുവെച്ചിട്ടുള്ളത്. മുരളി ഗോപിയുമൊത്തുള്ള ഒരു ചിത്രവും പങ്കു വെച്ച് കൊണ്ട് പൃഥ്വിരാജ് കുറിച്ചിരിക്കുന്നത് ഇങ്ങനെയാണ്.

താനിപ്പോൾ എഴുത്തുകാരന്റെ മടയിലാണുള്ളത്, മുരളി ഇപ്പോൾ എമ്പുരാൻ എന്ന ചിത്രത്തെ കുറിച്ച് തന്നോട് പറഞ്ഞത് ലോകത്തിൻ്റെ ഏതുകോണിൽ പോയി ഞാൻ ഷൂട്ട് ചെയ്യും എന്നത് ആലോചിച്ചാണ് തന്റെ കണ്ണുകൾ ഇങ്ങനെ വിടർന്നിരിക്കുന്നത്.

ലൂസിഫറിനെക്കാളും വലിയ രീതിയിലാണ് എമ്പുരാൻ ഒരുക്കുക. പൃഥ്വിരാജ്- മുരളി ഗോപി- ആന്റണി പെരുമ്പാവൂർ ടീം അടുത്ത വർഷം ചിത്രം ആരംഭിക്കുമെന്നാണ് വിവരം. അതിന് മുന്നോടിയായി മോഹൻലാലിന് കമ്മിറ്റഡായ ഏതാനും പ്രൊജെക്ടുകൾ തീർക്കാനുണ്ടെന്നും അതിന് ശേഷമാകും എമ്പുരാൻ തുടങ്ങുക എന്നും റിപ്പോര്‍ട്ടുകളുണ്ടായിരുന്നു.