കല്യാണി ഇങ്ങനെയൊന്നും ചെയ്യുമെന്ന് സ്വപ്‌നത്തില്‍പ്പോലും കരുതിയതല്ല! ഈ മുഹൂര്‍ത്തം ഞാന്‍ ജീവിതത്തില്‍ പ്രതീക്ഷിച്ചിട്ടില്ലെന്ന് പ്രിയദര്‍ശന്‍ പറയാന്‍ കാരണം?

മലയാളികളുടെ എക്കാലത്തേയും പ്രിയപ്പെട്ട സംവിധായകരിലൊരാളാണ് പ്രിയദര്‍ശന്‍. അച്ഛനും അമ്മയ്ക്കും പിന്നാലെയായി മക്കളും സിനിമയില്‍ സാന്നിധ്യം അറിയിച്ചിരിക്കുകയാണ്. തെലുങ്ക് ചിത്രത്തിലൂടെയായാണ് കല്യാണി അരങ്ങേറ്റം കുറിച്ചത്. മകള്‍ക്ക് സിനിമയില്‍ അഭിനയിക്കാന്‍ ആഗ്രഹമുണ്ടായിരുന്നു എന്നത് തന്നെ ആശ്ചര്യപ്പെടുത്തിയ കാര്യമാണെന്ന് പ്രിയദര്‍ശന്‍ പറഞ്ഞിരുന്നു. യാദൃശ്ചികമായാണ് മകള്‍ സിനിമയിലെത്തിയതെന്നായിരുന്നു അദ്ദേഹം പറഞ്ഞത്. മഴവില്‍ എന്റര്‍ടൈന്‍മെന്‍സ് അവാര്‍ഡില്‍ കല്യാണിക്ക് ലഭിച്ച പുരസ്‌കാരം ഏറ്റുവാങ്ങാനെത്തിയത് പ്രിയദര്‍ശനായിരുന്നു. പ്രണവിനുള്ള പുരസ്‌കാരം സ്വീകരിച്ചത് മോഹന്‍ലാലായിരുന്നു.
സത്യന്‍ അന്തിക്കാടായിരുന്നു മോഹന്‍ലാലിനേയും പ്രിയദര്‍ശനേയും വേദിയിലേക്ക് വിളിച്ചത്. ബെസ്റ്റ് എന്റര്‍ടൈനിംഗ് കപ്പിള്‍ അവാര്‍ഡായിരുന്നു പ്രണവിനും കല്യാണിക്കും ലഭിച്ചത്. ഈ പേര് പറയാന്‍ തന്നെ എനിക്കിഷ്ടമുണ്ട്. അവരുടെ പിതാക്കന്‍മാര്‍ എന്റെ സുഹൃത്തുക്കളാണ്. കല്യാണി ആദ്യമായി മലയാളത്തില്‍ അഭിനയിച്ചത് എന്റെ മോന്‍ സംവിധാനം ചെയ്ത ചിത്രത്തിലാണ്. ശ്രീനിവാസന്റെ മകന്‍ വിനീത് ശ്രീനിവാസന്‍ സംവിധാനം ചെയ്ത ചിത്രത്തിലാണ് പ്രണവും കല്യാണിയും ഒന്നിച്ച് അഭിനയിച്ചത്. മൊത്തത്തില്‍ ഇതൊരു കുടുംബ സദസാണെന്നായിരുന്നു സത്യന്‍ അന്തിക്കാട് പറഞ്ഞത്.
അതീവ സന്തോഷത്തോടൊയായാണ് മോഹന്‍ലാലും പ്രിയദര്‍ശനും വേദിയിലേക്കെത്തിയത്. പല കാര്യങ്ങളും ഓര്‍ത്തിട്ടുണ്ടെങ്കിലും ഇങ്ങനൊരു മുഹൂര്‍ത്തം ജീവിതത്തിലൊരിക്കലും ഓര്‍ത്തിട്ടില്ലെന്നായിരുന്നു പ്രിയദര്‍ശന്‍ പറഞ്ഞത്. ഇതിനപ്പുറമൊരു അവാര്‍ഡ് വേദി എനിക്കും മോഹന്‍ലാലിനും പങ്കിടാനില്ല. എന്റെ മകള്‍ സിനിമയില്‍ അഭിനയിക്കുമെന്ന് ഞാനൊരിക്കലും കരുതിയിട്ടില്ല, നമ്മള്‍ വിചാരിക്കുന്ന പോലെയല്ലല്ലോ കാര്യങ്ങള്‍ നടക്കുന്നത്. അതങ്ങ് സംഭവിച്ച് പോവുകയാണ്. സിനിമാകുടുംബത്തിന് കിട്ടിയ അവാര്‍ഡാണ് ഇതെന്നുമായിരുന്നു പ്രിയദര്‍ശന്‍ പറഞ്ഞത്.
പ്രണവിനും കല്യാണിക്കും സിനിമയില്‍ അഭിനയിക്കാന്‍ താല്‍പര്യമുണ്ടായിരുന്നില്ല. ഞങ്ങളെപ്പോലെ യാദൃശ്ചികമായാണ് അവരും സിനിമയിലെത്തിയത്. ഞങ്ങള്‍ക്കേറെ പ്രിയപ്പെട്ട ശ്രീനിവാസന്റെ മകന്റെ ചിത്രത്തിലൂടെയാണ് അവര്‍ ഇരുവരും ഒരുമിച്ചത് എന്നത് ഏറെ സന്തോഷമുള്ള കാര്യമാണെന്നായിരുന്നു മോഹന്‍ലാല്‍ പറഞ്ഞത്.