‘ഫോൺ നമ്പർ അല്ല, ഫോൺ തന്നെ തരാം’; ധനുഷ് അടങ്ങുന്ന സദസ്സിനെ ചിരിയിലാഴ്ത്തി മഞ്ജുവും പാർഥിപനും!

മഞ്ജുവിന്റെ പുത്തൻ ചിത്രങ്ങളും പുതുപുത്തൻ വിശേഷങ്ങളുമെല്ലാം ആരാധകര്‍ ഇരുകൈയ്യും നീട്ടി സ്വീകരിക്കാറുമുണ്ട്. അടുത്തിടെ താരം പങ്കെടുത്ത ഒരു അവാര്‍ഡ് ഫംഗ്ഷനിടെ നടൻ പാര്‍ത്ഥിപനുമായി നടത്തിയ നര്‍മ്മ സല്ലാപത്തിൻ്റെ വീഡിയോ സോഷ്യൽ മീഡിയയിൽ വൈറലാണ്.

ബിഹൈന്‍ഡ് വുഡ്സിന്റെ അവാര്‍ഡ്ദാന ചടങ്ങില്‍ വെച്ച് മഞ്ജു നടന്‍ പാര്‍ഥിപനുമായി കണ്ടുമുട്ടിയിരുന്നു. ഇരുവരും തമ്മിൽ നടത്തിയ രസകരമായ സംഭാഷണം ഇപ്പോള്‍ സോഷ്യല്‍ മീഡിയ ഏറ്റെടുത്തരിക്കുകയാണ്.

പരിപാടിയുടെ അവതാരകനായിരുന്ന പാർഥിപൻ താൻ മഞ്ജുവിന്റെ ആരാധകനാണെന്ന് വേദിയിൽ വെച്ച് തുറന്നുപറഞ്ഞു. ഒരു നല്ല ആസ്വാദകയ്‌ക്കേ നല്ലൊരു അഭിനേത്രിയാകാൻ കഴിയൂ എന്നാണ് പാർത്ഥിപൻ മഞ്ജുവിനെക്കുറിച്ച് പറഞ്ഞത്.

പാർഥിപൻ സംവിധാനം ചെയ്ത 'കഥൈ, തിരക്കഥെയ്‌, വാസനം, ഇയക്കം' എന്ന ചിത്രം കണ്ട ശേഷം മഞ്ജു വാര്യർ ഒരു രാത്രി അദ്ദേഹത്തെ ഫോണിൽ വിളിച്ച് അഭിനന്ദനം അറിയിച്ച കാര്യം വേദിയിൽ വെച്ച് അദ്ദേഹം പങ്കുവച്ചിരുന്നു.

പാര്‍ത്ഥിപൻ തന്നെയൊരുക്കിയ മറ്റൊരു ചിത്രമായ 'ഒത്ത സെരുപ്പ്‌ സൈസ് 7' കണ്ടിരുന്നു എങ്കിൽ മഞ്ജു വീണ്ടും അഭിനന്ദിക്കാൻ വിളിച്ചേനെ എന്ന് ഇതിനോടൊപ്പം കൂട്ടിച്ചേർക്കാനും താരം മറന്നില്ല.

ഇതു കേട്ട മഞ്ജു ഉടൻ ഇടയ്ക്ക് കയറി പറഞ്ഞ സംഗതി ഇതായിരുന്നു, സിനിമ താൻ കണ്ടിരുന്നു എന്നും പാർഥിപന്റെ ഫോൺ നമ്പർ നഷ്ടപ്പെട്ടതിനാലാണ് ഫോണിൽ വിളിച്ച് അഭിനന്ദിക്കാൻ കഴിയാതിരുന്നത് എന്നുമാണ് മഞ്ജു പറഞ്ഞത്.

ഇതിന് മറുപടിയായി പാര്‍ത്ഥിപൻ പറഞ്ഞ സംഗതി ഏറെ ആരാധകരുടെ കൈയ്യടി ആകര്‍ഷിക്കുകയാണ്. ഇതുകേട്ടതും "ഫോൺ നമ്പർ അല്ല, ഫോൺ തന്നെ തരാ"മെന്നായിരുന്നു പാർഥിപൻ്റെ മറുപടി. വേദിയിലിരുന്ന ധനുഷ് അടക്കമുള്ളവർ ഇത് കേട്ട് പൊട്ടിച്ചിരിച്ചു.