'മമ്മൂക്ക മറ്റു ഭാഷകളിലെത്തുന്നത് നായകനായാണ്; സഹനടനായല്ല'; സംവിധായകൻ്റെ വാക്കുകളെ ഏറ്റെടുത്ത് സോഷ്യൽ മീഡിയ

മലയാളത്തിൻ്റെ മെഗാസ്റ്റാര്‍ മമ്മൂട്ടിയെ പറ്റി സംവിധായകനും ടെലിവിഷൻ അവതാരകനും നടനുമായ രമേശ് പിഷാരടി പറഞ്ഞ കര്യം വൈറലാകുന്നു. മമ്മൂട്ടി നായകനായി അടുത്തിടെ തീയേറ്ററുകളിലെത്തിയ രണ്ട് ഭാഷകളിലെ ചിത്രങ്ങൾ നിരൂപക പ്രേക്ഷക പ്രശംസ പിടിച്ചു പറ്റിയിരുന്നു. നിരവധി ചലച്ചിത്രമേളകളിലും മമ്മൂട്ടി നായകനായ തമിഴ് ചിത്രം പേരൻപും തെലുങ്ക് ചിത്രം യാത്രയും ശ്രദ്ധ നേടി.

ഈ രണ്ട് ചിത്രങ്ങളിലും മമ്മൂട്ടി അല്ലാതെ മറ്റൊരാൾക്കും ആ കഥാപാത്രം ചെയ്യാനാകില്ലെന്ന് രണ്ട് ചിത്രങ്ങളുടെയും സംവിധായകരും വ്യക്തമാക്കിയിരുന്നു. ഇതേ കാര്യം ആവര്‍ത്തിച്ച് പറയുകയാണ് നടനും സംവിധായകനുമായ രമേഷ് പിഷാരടി. തമിഴിലും തെലുങ്കിലും ഒക്കെ മമ്മൂക്കയെ വിളിക്കുന്നത് സഹനടനായിട്ടല്ല, നായകനായിട്ട് തന്നെയാണെന്ന് പിഷാരടി പറഞ്ഞു. ഒരു ചാനൽ പരിപാടിക്കിടെയായിരുന്നു സംഭവം നടന്നത്. അടുത്തിരുന്ന മമ്മൂക്ക പിഷാരടിയുടെ വാക്കുകളെ അതേയെന്ന് പറഞ്ഞ് ശരി വെക്കുന്നുമുണ്ട്.

രമേശ് പിഷാരടി സംവിധാനം ചെയ്യുന്ന മമ്മൂട്ടി നായകനാകുന്ന ഗാനഗന്ധര്‍വ്വൻ ഈ ആഴ്ച തീയേറ്ററുകളിലെത്താൻ ഒരുങ്ങുകയാണ്. ചിത്രത്തിൽ ഗാനമേള പാട്ടുകാരനായ കലാസദൻ ഉല്ലാസായാണ് മമ്മൂട്ടി വേഷമിടുന്നത്. ചിത്രത്തിൽ പുതുമുഖം വന്ദിതയാണ് നായിക. രമേഷ് പിഷാരടിയും ഹരി പി നായരും ചേർന്നാണ് ചിത്രത്തിന് കഥയും തിരക്കഥയും സംഭാഷണവും ഒരുക്കിയിരിക്കുന്നത്. മുകേഷ്, ഇന്നസെൻ്റ്, സിദ്ദീഖ്, സലിം കുമാര്‍, ധര്‍മജന്‍ ബോള്‍ഗാട്ടി, ഹരീഷ് കണാരന്‍, മനോജ് കെ ജയന്‍, സുരേഷ് കൃഷ്ണ, മണിയന്‍ പിള്ള രാജു, കുഞ്ചന്‍, അശോകന്‍, സുനില്‍ സുഖദ, അതുല്യ, ശാന്തി പ്രിയ തുടങ്ങി വലിയൊരു താരനിര തന്നെ ചിത്രത്തിൽ പ്രധാന വേഷങ്ങളില്‍ എത്തുന്നു.

അഴകപ്പന്‍ ഛായാഗ്രഹണവും ലിജോ പോള്‍ എഡിറ്റിങ്ങും നിര്‍വഹിക്കുന്ന ഗാനഗന്ധര്‍വന് സംഗീതമൊരുക്കുന്നത് ദീപക് ദേവാണ്. ഇച്ചായീസ് പ്രൊഡക്ഷന്‍സും രമേഷ് പിഷാരടി എന്‍റര്‍ടെയ്ൻമെന്‍റ്സും ചേര്‍ന്നൊരുക്കുന്ന ഗാനഗന്ധര്‍വന്‍റെ നിര്‍മാണം ശ്രീലക്ഷ്മി, ശങ്കര്‍ രാജ്, സൗമ്യ രമേഷ് എന്നിവര്‍ ചേര്‍ന്നാണ് നിര്‍വ്വഹിക്കുന്നത്.ജയറാമിനെ നായകനാക്കി ഒരുക്കിയ പഞ്ചവർണ്ണതത്തയായിരുന്നു രമേഷ് പിഷാരടി സംവിധാനം ചെയ്ത ആദ്യത്തെ ചിത്രം.