പ്രതിഫലം പോലും മേടിക്കാതെ അജു വര്‍ഗീസ് എന്റെ സിനിമയില്‍ സഹകരിച്ചു! നന്ദി പറഞ്ഞ് രഞ്ജിത് ശങ്കര്‍! ആ കടം ഞാന്‍ മേടിച്ചെന്ന് അജുവും

വ്യത്യസ്തമായ കഥാപാത്രങ്ങളിലൂടെയായി പ്രേക്ഷകര്‍ക്ക് സുപരിചിതനായി മാറിയ താരമാണ് അജു വര്‍ഗീസ്. സണ്ണിയെന്ന സിനിമയ്ക്കായി അജുവിനെ വിളിച്ചതിനെക്കുറിച്ചും നടന്‍ ഡബ്ബ് ചെയ്തതിനെക്കുറിച്ചും തുറന്നുപറഞ്ഞിരിക്കുകയാണ് രഞ്ജിത് ശങ്കര്‍. ഫേസ്ബുക്ക് കുറിപ്പിലൂടെയായിരുന്നു രഞ്ജിത് ശങ്കര്‍ അജുവിനെക്കുറിച്ച് വാചാലനായത്.
സണ്ണി ഒറ്റയ്ക്കാണ് എങ്കിലും ഒറ്റക്ക് ഒരു സിനിമ ചെയ്യുക എന്നത് വളരെ വളരെ പ്രയാസകരമാണ്. പരസ്പരം ഉള്ള വിശ്വാസം,കൂടെയുണ്ടാവും എന്നുറപ്പുള്ള സുഹൃത്തുക്കൾ ഒക്കെ വളരെ വലിയ ഒരു ധൈര്യമാണ്. അജു എനിക്ക് അത് പോലെ ഒരു ധൈര്യമാണ്. സണ്ണിയിലെ കോഴി അജു ആവുമെന്ന് ഞാൻ കരുതിയതല്ല. ഒരു പുതിയ കോമ്പിനേഷൻ എന്ന നിലയിൽ മറ്റൊരാളെ ആണ് ഷൂട്ടിംഗ് സമയത്ത് തീരുമാനിച്ചത്. ഡബ്ബിംഗ് സമയത്ത് അദ്ദേഹം ചെറിയ അസൗകര്യം പറഞ്ഞപ്പോ മറ്റാര് എന്നാലോചിച്ചു. അജുവിൻ്റെ മുഖം പെട്ടെന്ന് തെളിഞ്ഞു. കാര്യം പറഞ്ഞു മെസ്സേജ് അയച്ചപ്പോൾ അജു പറഞ്ഞു ഇപ്പൊ വരാം, ഇവിടെ നിന്ന് സ്റ്റുഡിയോ എത്താനുള്ള സമയം.രണ്ടു പടത്തിൻ്റെ ഷൂട്ടിംഗിന് ഇടയിൽ നിന്നാണെന്ന് ഓർക്കണം.
കോഴി എന്ന ഫോൺ ക്ലോസപ്പിൽ മറ്റൊരു നടൻ്റെ ഫോട്ടോ കണ്ടിട്ടും ഒന്നും പറയാതെ വളരെ മനോഹരമായി അജു ഡബ്ബ് ചെയ്തു. ചെറിയ കറക്ഷൻസ് ചെയ്യാൻ ഒരു മടിയും കൂടാതെ വീണ്ടും രണ്ടു പ്രാവശ്യം വീണ്ടും വന്നു. പ്രതിഫലം കൊടുത്തപ്പോൾ വാങ്ങിക്കാൻ കൂട്ടാക്കാതെ ആവശ്യം വരുമ്പോ കടമായി ചോടിച്ചോളം എന്ന് തമാശ പറഞ്ഞു. താങ്ക് യൂ അജു വർഗീസ് എന്നുമായിരുന്നു രഞ്ജിത് ശങ്കര്‍ കുറിച്ചത്. എന്റെ അഭിനയ ജീവിതത്തിൽ വിവിധ തരം വേഷങ്ങൾ റിസ്ക് എടുത്തു എനിക്ക് തന്ന ഗുരുക്കന്മാരിൽ ഒരാൾ. ഈ വാക്കുകൾ വളരെ വലുതാണ് എനിക്ക്. കടം ഞാൻ വാങ്ങി, മറന്ന് പോയോ എന്ന് ചോദിച്ചായിരുന്നു അജു രഞ്ജിത് ശങ്കറിന്റെ കുറിപ്പ് ഷെയർ ചെയ്തത്.