'പേളി കലക്കിട്ടോ, എൻ്റെ പേളിക്കുട്ടീ നിന്നെയോർത്ത് അഭിമാന'മെന്ന് റിമി ടോമി!

മലയാളികളുടെ പ്രിയപ്പെട്ട നടിയും അവതാരകയുമൊക്കെയാണ് പേളി മാണി. അവതാരകയായി തിളങ്ങി നിൽക്കവേയാണ് പേളി മാണി ബിഗ്ബോസ് മലയാളം സീസൺ 2ലെ മത്സരാർത്ഥികളിൽ ഒരാളായി എത്തിയത്. ഇതോടെ പേളിയ്ക്ക് ആരാധകരേറി. അതിനു പിന്നാലെയാണ് പേളി മാണി ബോളിവുഡിലേക്ക് അരങ്ങേറിയത്. അനുരാഗ് ബസു സംവിധാനം ചെയ്ത ലുഡോയിലൂടെയാണ് പേളി മാണി തൻ്റെ ബോളിവുഡ് അരങ്ങേറ്റം കുറിച്ചിരിക്കുന്നത്. ചിത്രത്തിൽ ഒരു മലയാളി നേഴ്സിൻ്റെ കഥാപാത്രമായാണ് പേളി പ്രത്യക്ഷപ്പെട്ടത്.

Also Read: ജോ‍ർജ് അറിയാതെ പോയ പ്രണയം

സഹതാരങ്ങളുമായി കിടപിടിക്കുന്ന തരത്തിലുള്ള അഭിനയമാണ് പേളി കാഴ്ചവെച്ചത്. നിരവധി താരങ്ങളും പേളിയുടെ അഭിനയത്തെ പ്രശംസിച്ച് രംഗത്തെത്തിയിരുന്നു. ഇപ്പോഴിതാ ലുഡോ സിനിമയിലെ പേളിയുടെ അഭിനയത്തെ പ്രശംസിച്ച് നടിയും അവതാരകയും ഗായികയുമായ റിമി ടോമി രംഗത്തെത്തിയിരിക്കുകയാണ്. ലുഡോ കാണുന്നതിൻ്റെ സ്ക്രീൻ ഷോട്ട് അടക്കം പങ്കുവെച്ചുകൊണ്ടാണ് റിമിയുടെ കുറിപ്പ്. ഇൻസ്റ്റാഗ്രാമിലൂടെയാണ് റിമി ടോമി പേളിയുടെ അഭിനയത്തെ പ്രശംസിച്ച് രംഗത്തെത്തിയത്. 'പേളി നിനക്കായി ലുഡോ കാണുകയാണ്.'

Also Read: ഗര്‍ഭത്തെ കുറിച്ച് പറയുന്നത് നിര്‍ത്തി, എന്റെ സിനിമയെ കുറിച്ച് വാര്‍ത്ത കൊടുക്കൂ; മാധ്യമങ്ങളോട് പേളി

'പേളി നീ കലക്കി ട്ടോ, ഇത്രയും പോപുലർ ആയ ഒരു ബോളിവുഡ് സിനിമയിലെ ഒരു റോൾ, അതും നമ്മുടെ പേളി, എൻ്റെ പേളിക്കുട്ടി നിന്നെയോർത്ത് അഭിമാനം. മലയാളി പണ്ടേ പൊളി അല്ലേ' എന്നാണ് റിമി ടോമി കുറിച്ചിരിക്കുന്നത്. മികച്ച പ്രതികരണമാണ് പേളിയുടെ ബോളിവുഡ് അരങ്ങേറ്റത്തിന് ലഭിക്കുന്നത്. നാല് കഥകളിലൂടെ സഞ്ചരിക്കുന്ന സിനിമയില്‍ ഒരു പ്രധാന കഥ പേളിയുടെ കഥാപാത്രവുമായി ബന്ധപ്പെട്ട് പുരോഗമിക്കുന്നുണ്ട്. പേളി ചിത്രത്തിൽ ഒരു മലയാളി നഴ്സായാണ് അഭിനയിക്കുന്നത്. പങ്കജ് ത്രിപാഠി, രാജ്കുമാര്‍ റാവു, അഭിഷേക് ബച്ചന്‍, ഫാത്തിമ സന ഷെയ്ഖ് തുടങ്ങിയവരാണ് ചിത്രത്തിലെ മറ്റു താരങ്ങൾ.