വിവരംകെട്ട ഫാനുകളെ പാലൂട്ടി വളര്‍ത്തുന്നു: ശാരദക്കുട്ടി

കസബ മാത്രമല്ല സ്ത്രീ വിരുദ്ധ ഡയലോഗുള്ള സിനിമ എന്ന് എഴുത്തുകാരി ശാരദക്കുട്ടി. കസബ തമ്മില്‍ ഏറ്റവും നിലവാരം കുറഞ്ഞതായിരിക്കാമെന്നും അവര്‍ അഭിപ്രായപ്പെട്ടു. മമ്മൂട്ടി മാത്രമല്ല, ഇക്കാര്യത്തില്‍ മോഹന്‍ലാലും ദിലീപും മോശമല്ല. മമ്മൂട്ടിക്കെതിരെയല്ല, മമ്മൂട്ടിമാര്‍ക്കെതിരെയാണ്. പാര്‍വതിക്കൊപ്പമല്ല, പാര്‍വതിമാര്‍ക്കൊപ്പമാണെന്ന് ശാരദക്കുട്ടി ഫേസ്ബുക്കിൽ കുറിച്ചു.

കസബയെയും വിമര്‍ശിച്ച്‌ സംസാരിച്ച നടി പാര്‍വതിക്ക് നേരെ കടുത്ത ആക്രമണമാണ് സാമൂഹികമാധ്യമങ്ങള്‍ വഴി നടക്കുന്നത്. സാമൂഹിക മാധ്യമങ്ങളില്‍ പാര്‍വതിക്കെതിരെ ആരാധകക്കൂട്ടങ്ങള്‍ ഇത്തരത്തില്‍ നടത്തുന്ന ഇത്തരം അധിക്ഷേപങ്ങള്‍ക്കെതിരെ രംഗത്തുവന്നിരിക്കുകയാണ് എഴുത്തുകാരി ശാരദക്കുട്ടി.

ശാരദക്കുട്ടിയുടെ കുറിപ്പിന്റെ പൂര്‍ണ രൂപം

കസബ മാത്രമല്ല സ്ത്രീവിരുദ്ധ ഡയലോഗുള്ള സിനിമ. കസബ തമ്മിൽ ഏറ്റവും നിലവാരം കുറഞ്ഞ, അധമമായത് ആയിരിക്കാം. മീശ മാധവൻ, താണ്ഡവം, ദേവാസുരം, ആറാം തമ്പുരാൻ.. നിര നീണ്ടതാണ്. പാർവ്വതി മാത്രമല്ല സൈബര്‍ ആക്രമണം നേരിടുന്ന സ്ത്രീ. പാര്‍വ്വതി കൂട്ടത്തില്‍ ഏറ്റവും പ്രശസ്തയായ സ്ത്രീ ആയിരിക്കാം.

തന്റേടത്തോടെ മിണ്ടിയപ്പോഴൊക്കെ ഓരോ പെണ്ണിന്റെ ശരീരത്തിലും അശ്ലീല വാക്കുകളുടെ കമ്ബിപ്പാരകള്‍ കുത്തിക്കയറ്റി രസിച്ചിട്ടുണ്ട് സൈബര്‍ ഗുണ്ടകള്‍. സുജ മാത്രമല്ല ആണത്താഘോഷങ്ങളെ പിന്താങ്ങുന്ന പെണ്‍ഫാന്‍. ഇവിടുത്തെ സെറ്റുമുണ്ടും സാരിയും ചുരിദാറുമിട്ട ആണ്‍ബോധവാഹകര്‍ ആയ സ്ത്രീകള്‍ എന്നും അതു തന്നെയാണ് ചെയ്യുന്നത്.

മമ്മൂട്ടി മാത്രമല്ല വിവരം കെട്ട ഫാനുകളെ പാലൂട്ടി വളര്‍ത്തുന്ന നടന്‍. കസബയില്‍ വന്നത് മമ്മൂട്ടി ആയിരിക്കാം .മോഹന്‍ലാല്‍, ദിലീപ്, ആരും മോശമല്ല. മമ്മൂട്ടിക്കെതിരെ മാത്രമല്ല, മമ്മൂട്ടിമാര്‍ക്കെതിരെ. പാര്‍വ്വതിക്കൊപ്പം മാത്രമല്ല, പാര്‍വ്വതിമാര്‍ക്കൊപ്പം.. സെലക്ടീവായല്ല, കളക്ടീവായാണ് ആക്രമണമെങ്കില്‍ പ്രതിരോധവും സെലക്ടീവാകരുത് കളക്ടീവാകണം.