സ്വന്തം കടയുടെ പരസ്യത്തിന് ഭർത്താവിനെ പെൺവേഷം കെട്ടിച്ച ഭാര്യ!

'സ്വന്തം കടയുടെ പരസ്യത്തിന് ഭർത്താവിനെ പെൺവേഷം കെട്ടിച്ച ഭാര്യ!' സരിത ജയസൂര്യ സമൂഹ മാധ്യമങ്ങളിൽ കേട്ട പഴിയാണ് ഇത്. സംഭവം മനസിലായില്ലേ, അത് തന്നെ! ജയസൂര്യ മുഖ്യവേഷത്തിൽ എത്തുന്ന 'ഞാൻ മേരിക്കുട്ടി' എന്ന ചിത്രത്തിലെ ജയസൂര്യയുടെ ലുക്കാണ് സരിത ജയസൂര്യയുടെ ബ്യൂട്ടിക്കിന്‍റെ പരസ്യത്തിനായി ഉപയോഗിച്ചിരിക്കുന്നത്. കൊച്ചി നഗരത്തിലെ പലയിടങ്ങളിലും താരത്തിന്‍റെ ഈ ചിത്രം അടങ്ങുന്ന പരസ്യ ഹോര്‍ഡിങ്സ് പൊങ്ങിയിട്ടുണ്ട്.

സരിതയാണ് ചിത്രത്തിൽ ജയസൂര്യയുടെ വസ്ത്രങ്ങൾ ഡിസൈൻ ചെയ്തിരിക്കുന്നത്. ഇതിന്‍റെ ചിത്രങ്ങൾ ഞാൻ മേരിക്കുട്ടിയുടെ സംവിധായകൻ രഞ്ജിത് ശങ്കര്‍ തന്നെയാണ് ഫേസ്ബുക്കിലൂടെ പങ്കുവെച്ചത്. 'ലോക ചരിത്രത്തിൽ ആദ്യമായി സ്വന്തം കടയുടെ പരസ്യത്തിന് ഭർത്താവിനെ പെൺവേഷം കെട്ടിച്ച ഭാര്യ! എന്ന തലക്കെട്ടോടെയാണ് ഇത്'.


സംവിധായകൻ പങ്കുവെച്ച സരിതയുടെ ബോട്ടിക്കിന്‍റെ പരസ്യ ഹോര്‍ഡിങ്സിന്‍റെ ചിത്രം പസമൂഹമാധ്യമങ്ങളിൽ ഇതിനോടകം വൈറലായിരിക്കുകയാണ്. ചിത്രത്തിന്‍റെ ട്രെയിലര്‍ പുറത്തുവിട്ടതും കഴിഞ്ഞദിവസമായിരുന്നു. ട്രെയിലര്‍ യൂട്യൂബിൽ ഇന്നും മുന്നിലാണ്. ആട് 2വില്‍ തരംഗമായി മാറിയ ഷാജി പാപ്പന്‍റെ രണ്ട് നിറങ്ങളുള്ള ഡബിൾ സൈഡ് മുണ്ട് ഡിസൈൻ ചെയ്തതും സരിതയായിരുന്നു.