സിനിമാ മേഖലയിലെ അപ്രഖ്യാപിത വിലക്കിനെതിരെ സയനോര ഫിലിപ്പും

സിനിമാ മേഖലയിലെ അപ്രഖ്യാപിത വിലക്കിനെതിരെ സയനോര ഫിലിപ്പും രംഗത്ത്. തന്‍റെ ഫേസ്ബുക്കിലൂടെയാണ് സയനോര വിഷയത്തിൽ പ്രതികരിച്ചിരിക്കുന്നത്. 'സംരക്ഷിക്കേണ്ടവർ വിലക്കുന്ന യുഗം..കലിയുഗം'. എന്ന് സയനോര കുറിച്ചു.

അമല്‍ നീരദിന്‍റെയും അന്‍വര്‍ റഷീദിന്‍റെയും നിര്‍മ്മാണ വിതരണ കമ്പനികള്‍ക്കെതിരെ പ്രതികാര നടപടി നടക്കുന്നതായി റിപ്പോര്‍ട്ട് പുറത്തു വന്ന സാഹചര്യത്തിൽ ആഷിഖ് അബുവും റിമ കല്ലിങ്കലും കഴിഞ്ഞദിവസം പ്രതികരിച്ചിരുന്നു. മള്‍ട്ടിപ്‌ളെക്‌സുകളില്‍ നിന്ന് സിനിമകള്‍ പിന്‍വലിച്ചുള്ള സമരത്തില്‍ സഹകരിച്ചില്ലെന്ന് കാട്ടിയാണ് ഇരുവര്‍ക്കും അപ്രഖ്യാപിത വിലക്കേര്‍പ്പെടുത്തിയിരിക്കുന്നതെന്ന് അമല്‍ നീരദും അന്‍വര്‍ റഷീദും പ്രമുഖ മാധ്യമത്തോട് പ്രതികരിച്ചിരുന്നു. ഈ സാഹചര്യത്തിൽ ഈ ബാനറുകൾ പുറത്തിറക്കുന്ന പറവ, ട്രാന്‍സ് എന്നീ സിനിമകളുടെ റിലീസിംഗ് പ്രതിസന്ധിയിലാകുമെന്നാണ് അറിയാൻ സാധിക്കുന്നത്.




ഇതേ കാരണം കൊണ്ടു തന്നെ ദുൽഖര്‍ നായകനായി തിയേറ്ററുകളിൽ മികച്ച രീതിയിൽ മുന്നേറി വന്ന സിഐഎ എന്ന സിനിമയെ സാധാരണ തിയറ്ററുകളില്‍ നിന്നും വിതരണക്കാരുടെ സംഘടനയായ ഡിസ്ട്രിബ്യൂട്ടേഴ്‌സ് അസോസിയേഷന്‍ വിലക്കിയിരിക്കുകയാണ്. ഈ പശ്ചാത്തലത്തിലാണ് താരങ്ങൾ പ്രതിഷേധവുമായി മുന്നോട്ട് വരുന്നത്.

ജനാധിപത്യപരമായി എന്തെങ്കിലും സംസാരിച്ചപ്പോള്‍ അപ്പോള്‍ തന്നെ വിലക്ക് എന്ന നിലപാടാണന്നും പൊതുസമൂഹവും സര്‍ക്കാരും ഇക്കാര്യം അറിയണമെന്ന് കരുതിയാണ് ഇപ്പോള്‍ സംസാരിക്കുന്നതെന്നും അമൽ നീരദും അൻവർ റഷീദും പ്രതികരിച്ചിരുന്നു. കോംപറ്റീഷന്‍ അതോറിറ്റി പോലെ സര്‍ക്കാര്‍ തലത്തില്‍ ഇക്കാര്യങ്ങളില്‍ ഒരു സ്ഥിരം സംവിധാനം ഇവിടെയും വേണമെന്നും ഇരുവരും ആവശ്യപ്പെട്ടിരുന്നു.


Sayanora Philip responds against unofficial ban in Film Production

Singer Sayanora Philip responds against unofficial ban in Film Production