സീരിയല്‍ താരം ദീപന്‍ മുരളി വിവാഹിതനായി

നിരവധി സീരിയലിലൂടെ കുടുംബ പ്രേക്ഷകർക്ക് പ്രിയങ്കരനായ നടന്‍ ദീപന്‍ മുരളി വിവാഹിതനായി. സോഷ്യൽ മീഡിയയിൽ ചിത്രങ്ങൾ പോസ്റ്റ് ചെയ്തതോടെയാണ് മുരളിയുടെ വിവാഹക്കാര്യം ആരാധകരും സഹപ്രവർത്തകരിൽ പലരും അറിഞ്ഞത്. നടൻ സുരാജ് വെഞ്ഞാറമൂടിന്റെ ഭാര്യയുടെ അടുത്ത ബന്ധുവായ മായയാണ് വധു.

പരിണയം, നിറക്കൂട്ട്, ഇവള്‍ യമുന, സ്ത്രീധനം തുടങ്ങിയ സീരിയലിലൂടെ കുടുംബപ്രേക്ഷകരുടെ ഇഷ്ടതാരമാണ് ദീപൻ. കഴിഞ്ഞ ജൂണ്‍ 22 നാണ് വിവാഹ നിശ്ചയം നടന്നത്. ഡിസംബറില്‍ വിവാഹം നടത്താനിരുന്നതാണെങ്കിലും അമ്മയുടെ മരണത്തിനുശേഷം വിവാഹം ഏപ്രിലിലേക്ക് നീട്ടിവയ്ക്കുകയായിരുന്നു. സൂരയാടല്‍ എന്ന തമിഴ് ചിത്രത്തിലൂടെ സിനിമയിലും അരങ്ങേറ്റം കുറിച്ചിട്ടുണ്ട്. അഭിനയത്തിന് പുറമെ അവതാരകനായും ദീപൻ തിളങ്ങിയിട്ടുണ്ട്.