അറ്റ്‌ലികുമാര്‍ സംവിധാനം ചെയ്യുന്ന ഈ ചിത്രത്തിലൂടെ സൗത്ത് ഇന്ത്യന്‍ സൂപ്പര്‍ ലേഡി നയന്‍താര ബോളിവുഡിലേക്ക് പോകുകയാണ്. അറസ്റ്റിനെ തുടര്‍ന്ന് ഷാരൂഖ് അഭിനയം മാറ്റി വച്ചപ്പോള്‍ നയന്‍താരയുടെ ഡേറ്റ് ക്ലാഷ് ആയി. അതോടെ പല ചിത്രങ്ങളും നടിയ്ക്ക് ഉപേക്ഷിക്കേണ്ടി വന്നു.
ബോളിവുഡിലെ ആദ്യ ചിത്രം
തെലുങ്കിലും തമിഴിലും ഒരു പിടി ചിത്രങ്ങളുമായി തിരക്കിലായിരുന്നു നയന്‍താര. ആ സമയത്താണ് ഷാരൂഖ് ഖാന്റെ ചിത്രം വരുന്നത്. ആദ്യ കാമുകന്‍ പ്രഭു ദേവ ബോളിവുഡ് സിനിമയില്‍ സജീവമായതിനാല്‍ ബോളിവുഡിലേക്കേ ഇല്ല എന്ന് പറഞ്ഞ നയന്‍, അറ്റ്‌ലി കുമാറിന്റെ നിര്‍ബന്ധത്തെ തുടര്‍ന്നാണ് ചിത്രം ഏറ്റെടുത്തത്.
സമാന്തയ്ക്ക് വച്ച വേഷം
സമാന്തയെ ആയിരുന്നു ഷാരൂഖ് ഖാനെ നായകനാക്കി അറ്റ്‌ലി സംവിധാനം ചെയ്യുന്ന ചിത്രത്തിലേക്ക് ആദ്യം പരിഗണിച്ച നായിക. സ്വകാര്യ ജീവിതത്തിലെ പ്രശ്‌നങ്ങള്‍ കാരണം സമാന്ത പിന്മാറിയപ്പോഴാണ് അവസരം നയന്‍താരയില്‍ എത്തിയത്. രാജാറാണി, ബിഗില്‍ എന്നീ ചിത്രങ്ങള്‍ക്ക് ശേഷം അറ്റ്‌ലിയ്‌ക്കൊപ്പം നയന്‍താര കൈ കോര്‍ക്കുന്ന മൂന്നാമത്തെ ചിത്രമാണ് ലയേണ്‍ (താത്കാലികമായി നല്‍കിയ പേര്) എന്ന പ്രത്യേകതയും ഉണ്ട്.
ഡേറ്റ് ക്ലാഷ് ആയി
എന്നാല്‍ ഈ ഒരു സിനിമയ്ക്ക് വേണ്ടി തെലുങ്കിലും തമിഴിലും സൈന്‍ ചെയ്ത രണ്ടോളം സിനിമകള്‍ നയന്‍താര ഉപേക്ഷിച്ചു എന്നതാണ് പുതിയ വാര്‍ത്ത. ഷാരൂഖ് ഖാന്‍ എത്താന്‍ വൈകിയതിനെ തുടര്‍ന്ന് ഷൂട്ടിങ് നീണ്ടു പോകുകയും, മറ്റ് സിനിമകള്‍ക്ക് നല്‍കിയ ഡേറ്റ് ക്ലാഷ് ആകുകയും ചെയ്തതോടെ, ആ സിനിമകള്‍ നയന്‍ ഉപേക്ഷിയ്ക്കുകയായിരുന്നു.
ലൂസിഫറിന്റെ റീമേക്ക്
ലൂസിഫറിന്റെ തെലുങ്ക് റീമേക്ക് നയന്‍ ഉപേക്ഷിക്കുന്നു എന്ന വാര്‍ത്തകള്‍ നേരത്തെ പുറത്ത് വന്നിരുന്നു. ചിത്രത്തിലെ കാസ്റ്റിങില്‍ നയന്‍താര തൃപ്ത അല്ലാത്തതിനാലാണ് ചിരജ്ജീവി നായകനാകുന്ന സിനിമ നടി ഉപേക്ഷിക്കുന്നത് എന്നായിരുന്നു ഗോസിപ്പ്. എന്നാല്‍ ഡേറ്റ് ക്ലാഷ് ആയതാണ് കാരണം എന്ന് ഔദ്യോഗികവൃത്തം പറയുന്നു.
തമിഴ് ചിത്രവും വിട്ടു
ഏറ്റവും ഒടുവില്‍, യുവരാജ് ദയാലന്‍ സംവിധാനം ചെയ്യുന്ന തമിഴ് ചിത്രത്തില്‍ നിന്നും ഇതേ കാരണത്താല്‍ നയന്‍താര പിന്മാറി. ചിത്രത്തിന്റെ നിര്‍മാതാവ് അത് സ്ഥിരീകരിയ്ക്കുകയും ചെയ്തു. ഡേറ്റ് ക്ലാഷ് ആയതിനെ തുടര്‍ന്ന് നയന്‍താര പിന്മാറിയ സാഹചര്യത്തില്‍ ശ്രദ്ധ ശ്രീനാഥ് ചിത്രത്തില്‍ നായികയായി എത്തും എന്നാണ് പുതിയ വിവരം.