ഞാന്‍ ഇങ്ങനെ ആയതിന്റെ 'കുറ്റക്കാരന്‍' നിങ്ങളാണ്, എന്നെ ഒരു പെണ്‍കുട്ടിയായി വളര്‍ത്തിയില്ല; അച്ഛന്‍ കമല്‍ ഹാസനോട് ശ്രുതി പറഞ്ഞത്

മക്കളെ പൂര്‍ണ സ്വാതന്ത്ര്യം നല്‍കി വളര്‍ത്തിയ അച്ഛനാണ് കമല്‍ ഹാസന്‍. അച്ഛന്റെ കഴിവ് മാത്രമല്ല, കരുതലും സ്‌നേഹവും ആവോളം തങ്ങള്‍ക്ക് കിട്ടിയതിനെ കുറിച്ച് പലപ്പോഴും അക്ഷര ഹാസനും ശ്രുതി ഹാസനും തുറന്ന് സംസാരിച്ചിട്ടുണ്ട്. ഇപ്പോഴിതാ കമല്‍ ഹാസനുമായുള്ള ചാറ്റ് ഷോയില്‍ താന്‍ എന്തുകൊണ്ട് ഒരു 'ഗോത്ത് ഗേള്‍' ആയി എന്നതിനെ കുറിച്ച് ശ്രുതി ഹാസന്‍ സംസാരിക്കുന്നു.

കൂടുതല്‍ കറുപ്പ് നിറത്തെ ഇഷ്ടപ്പെടുന്ന, കറുപ്പ് വേഷം ധരിക്കുന്ന, ഡാര്‍ക്ക് മേക്കപ്പ് ഉപയോഗിക്കുന്ന, ഗോഥിക് സാഹിത്യം ഇഷ്ടപ്പെടുന്ന, സമകാലിക ഹൊറര്‍ സിനിമാട്ടോഗ്രാഫിയെയൊക്കെ ഇഷ്ടപ്പെടുന്നവരെയാണ് പൊതുവെ 'ഗോത്ത്' എന്ന് വിളിച്ച് അഭിസംബോധന ചെയ്യുന്നത്. എന്തുകൊണ്ടാണ് ശ്രുതി അങ്ങനെ ആയത് എന്ന് കമല്‍ ഹാസന്‍ ചോദിച്ചപ്പോള്‍, അതിന് കാരണം നിങ്ങള്‍ തന്നെയാണ് എന്ന് ശ്രുതി മറുപടി നല്‍കി.

'കാരണം നിങ്ങള്‍ എന്നെ ഒരു പെണ്‍കുട്ടിയെ പോലെയല്ല വളര്‍ത്തിയത്. അത് ആര്‍ക്കും അറിയില്ല, ചളിയില്‍ കളിക്കാനും റോക്ക് സംഗീതം കേള്‍ക്കാനും ഒക്കെയാണ് അച്ഛന്‍ എപ്പോഴും എന്നെ പ്രോത്സാഹിപ്പിച്ചത്. മരുദനായകം എന്ന സിനിമ ചെയ്യുമ്പോഴുള്ള താടിയും, പച്ചകുത്തിയതും എല്ലാം അച്ഛനെ കണ്ടാണ് ഞാന്‍ ശീലിച്ചത്. അതുകൊണ്ട് ഇതിന്റെ എല്ലാം കുറ്റം അച്ഛന്റേതാണ്.'

'മാത്രമല്ല, വീട്ടില്‍ എപ്പോഴും നിങ്ങള്‍ ധരിച്ചിരുന്നത് കറുത്ത വസ്ത്രങ്ങളായിരുന്നു. അതുകൊണ്ട് കറുപ്പ് ഒരു അടിപൊളി വസ്ത്രമാണെന്ന് ഞാന്‍ മനസ്സിലാക്കി. അപ്പോഴൊന്നും ഒരു പെണ്‍കുട്ടിയെ പോലെയല്ല വളര്‍ത്തിയത്'- ശ്രുതി പറഞ്ഞു. ഇനിയും എന്തുകൊണ്ടാണ് കറുപ്പ് നിറത്തിലുള്ള വസ്ത്രം ധരിക്കുന്നത് എന്ന് എന്നോട് ചോദിക്കരുത് എന്നും അതിന്റെ ബാക്കിയായി ശ്രുതി പറയുന്നുണ്ട്.

നായിക എന്നതിനപ്പുറം, ഗായികയായും ശ്രുതി ഇതിനോടകം ഇന്ത്യന്‍ സിനിമയില്‍ തന്റെ പേരെഴുതിക്കഴിഞ്ഞു. തമിഴ് - തെലുങ്ക് - ബോളിവുഡ് ചിത്രങ്ങളിലൂടെ ശ്രുതിയുടെ അഭിനയ മികവും പ്രേക്ഷകര്‍ കണ്ടതാണ്