ഗായകന്‍ ദലെര്‍ മെഹന്ദി മനുഷ്യക്കടത്ത് കേസില്‍ കുറ്റക്കാരന്‍

മനുഷ്യക്കടത്ത് കേസില്‍ കുറ്റക്കാരനാണെന്ന് കണ്ടെത്തിയ പ്രശസ്‍ത പഞ്ചാബി പോപ് ഗായകന്‍ ദലെര്‍ മെഹന്ദിക്ക് രണ്ട് വര്‍ഷം ജയില്‍ശിക്ഷ. പാട്യാല കോടതിയാണ് വിധി പറഞ്ഞത്.

ബോലോ താരാ രാര (ഹായോരബ്ബ), സാഹോരെ ബാഹുബലി തുടങ്ങിയ ഹിറ്റ് ഗാനങ്ങള്‍ മെഹന്ദിയുടെതാണ്.

2003ല്‍ തുടങ്ങിയ കേസിലാണ് മെഹന്ദി ഇപ്പോള്‍ കുടുങ്ങിയിരിക്കുന്നത്. ഗായകനും സഹോദരന്‍ ഷംഷെര്‍ സിങ്ങും ചേര്‍ന്ന് അനധികൃതമായി ആളുകളെ വിദേശത്തേക്ക് അയച്ചു എന്നതാണ് കേസിനാസ്‍പദമായ സംഭവം. സംഗീത സംഘത്തിലുള്ളവരാണെന്ന് തെറ്റിദ്ധരിപ്പിച്ച് ഉയര്‍ന്ന തുക വാങ്ങി ആളുകളെ മറ്റുരാജ്യങ്ങളിലേക്ക് കടത്തിയെന്ന് തെളിഞ്ഞു.

1998, 1999 വര്‍ഷങ്ങളില്‍ അനധികൃതമായി 10 പേരെ ഇത്തരത്തില്‍ മെഹന്ദി കടത്തിയിട്ടുണ്ടെന്നാണ് കേസ്. അമേരിക്കയിലെ സാന്‍ഫ്രാന്‍സിസ്‍കോ, ന്യൂജഴ്‍സി നഗരങ്ങളിലേക്ക് മനുഷ്യക്കടത്ത് നടത്തിയതെന്നും ബക്ഷീഷ് സിങ് എന്നയാള്‍ നല്‍കിയ പരാതിയില്‍ പറയുന്നു.