'ജാതീയമായി ഒന്നും പറഞ്ഞിട്ടില്ല; ഉപകാരം ചെയ്താലും ഉപദ്രവം ചെയ്യരുത്': നജീം അർഷാദ്

റിയാലിറ്റി ഷോകളിലൂടെയും മലയാളത്തിൽ നിരവധി ഹിറ്റ് ഗാനങ്ങളിലൂടെയും ശ്രദ്ധേയനായ ഗായകൻ നജീം അര്‍ഷാദ് ഒരു അഭ്യര്‍ത്ഥനയുമായി രംഗത്ത്. അടുത്തിടെ ഗായകൻ പങ്കെടുത്ത ഒരു ചാനൽ പരിപാടിയിൽ തൻ്റെ മാതാപിതാക്കളുടേത് മിശ്രവിവാഹം ആണെന്നും ഉമ്മച്ചി ഹിന്ദുവാണെന്നും പിന്നീട് മതം മാറിയതാണെന്നും പറഞ്ഞിരുന്നു. ഇത് പിന്നീട് വലിയ വാര്‍ത്തയായി. ഈ വാര്‍ത്തയെ ഓൺലൈൻ യൂട്യൂബ് ചാനലുകൾ വളച്ചൊടിച്ച് മറ്റൊരു വിധത്തിൽ അവതരിപ്പിച്ചത് ചൂണ്ടിക്കാട്ടി രംഗത്തെത്തിയിരിക്കുകയാണിപ്പോൾ. താന്‍ പറഞ്ഞ കാര്യങ്ങള്‍ വളച്ചൊടിച്ച് വര്‍ഗീയമായി ചിത്രീകരിക്കുന്നതിനെതിരേ തൻ്റെ ഔദ്യോഗിക ഫേസ്ബുക്കിൽ നജീം കുറിച്ചു.

താന്‍ ജാതീയമായി ഒന്നും പറഞ്ഞിട്ടില്ലെന്നും സംഗീതത്തിന് ജാതിയും മതവുമില്ലെന്നും ഉപകാരം ചെയ്തില്ലെങ്കിലും ഉപദ്രവം ചെയ്യരുതെന്നും നജീം അര്‍ഷാദ് കുറിപ്പിലൂടെ വ്യക്തമാക്കി.

നജീം അര്‍ഷാദിൻ്റെ ഫേസ്ബുക്ക് കുറിപ്പിൻ്റെ പൂര്‍ണ രൂപം കാണാം

Also Read: ഗായകൻ നജീം അർഷാദിനും തസ്നിക്കും ആൺകുഞ്ഞ്

എല്ലാവർക്കും നമസ്കാരം .. ഈ യിടെ ഒരു പ്രമുഖ ചാനലിൽ ഞാൻ ഗസ്റ്റ് ആയി പോയിരുന്നു .. എന്നോട് ചോദിച്ചപ്പോ അവിടെ ഞാൻ പറഞ്ഞ ഒരു കാര്യം അത് എല്ലാവർക്കും അറിയാവുന്ന ഒരു കാര്യം കൂടി ആണ് .. അതിനെ വളച്ചൊടിച്ചു വർഗീയമായി ചിത്രീകരിക്കുന്നവരോട് .. നിങ്ങൾ ഇത് ചെയ്യുന്നത് യൂട്യൂബ് ചാനൽ കണ്ടൻ്റിനും അത് വഴി പൈസ കിട്ടാനുമാണ് .. പക്ഷെ ഉപകാരം ചെയ്താലും ഉപദ്രവം ചെയ്യരുത് .. ഞാൻ ജാതീയമായി ഒന്നും പറഞ്ഞിട്ടില്ല .. എൻ്റെ ഉമ്മയും വാപ്പയും ഇൻ്റര്‍കാസ്റ്റ് മാര്യേജും ആയിരുന്നു ..കൺവേര്‍ട്ടഡ് ആയി ഇസ്ലാം മതം സ്വീകരിച്ചു ...അങ്ങനെ ഒരു ചുറ്റുപാടിൽ തന്നെ ആണ് ഞാൻ വളർന്നിട്ടുള്ളതും ... പിന്നെ എൻ്റെ സംഗീതം അതിനു ജാതിയില്ല മതമില്ല .. എല്ലാവര്‍ക്കും ഉള്ളതാണ് .. എല്ലാവരും കൂടി ആണ് എന്നെ വളർത്തിയത് .. അവർക്കു വേണ്ടി ശബ്ദം ഉള്ളത് വരെ ഞാൻ പാടും .. ഫേസ് ബുക്ക് അഡ്മിൻസ് ആൻഡ് യൂട്യൂബ് ഒരിക്കൽ കൂടി പറയുന്നു ഉപകാരം ചെയ്താലും ഉപദ്രവം ചെയ്‌യരുത്..ആൾക്കാർ ന്യൂസ് വായിക്കാൻ വേണ്ടി ഇങ്ങനെ ഉള്ള ക്യാപ്ഷൻസ് കൊടുക്കരുത്.. 🙏 ..

Also Read: ആദ്യം നയന്‍താര അടിച്ചു, നിവിന്‍ തിരിച്ചടിച്ചു; 'ലവ് ആക്ഷന്‍ ഡ്രാമ' ടീസര്‍


Also Read: ഷെയ്‌ന്‍റെ 'വലിയ പെരുന്നാള്‍' മോഷന്‍ പോസ്റ്റര്‍ പുറത്തിറക്കി ധനുഷ്

2007-ൽ ഐഡിയ സ്റ്റാര്‍ സിംഗര്‍ റിയാലിറ്റി ഷോയിൽ വിജയിയായതോടെയാണ് നജീം താരമായത്. മിഷൻ 90 ഡെയ്സിലൂടെയാണ് നജീം മലയാളസിനിമയിൽ പിന്നണി ഗായകനായി അരങ്ങേറ്റം കുറിച്ചത്. ശേഷം കാസനോവ, ഡോ.ലവ്, ഡയമണ്ട് നെക്ലേസ്, ട്രിവാൻഡ്രം ലോഡ്ജ്, അയാളും ഞാനും തമ്മിൽ, ഡാ തടിയാ, ദൃശ്യം, വെള്ളിമൂങ്ങ, വെള്ളിനക്ഷത്രം, ജോമോന്‍റെ സുവിശേഷങ്ങള്‍, എന്‍റെ ഉമ്മാന്‍റെ പേര്, ഇരുപത്തിയൊന്നാം നൂറ്റാണ്ട്, മിസ്റ്റർ ആൻഡ്‍ മിസ് റൗഡി തുടങ്ങി നിരവധി ചിത്രങ്ങളിൽ നജീം പാടുകയുണ്ടായി.

Also Read: ഗായകൻ നജീം അർഷാദ് വിവാഹിതനായി

1971-ബിയോണ്ട് ബോഡേഴ്സ് എന്ന ചിത്രത്തിലെ രണ്ട് ഗാനങ്ങള്‍ക്ക് സംഗീതസംവിധാനം നിര്‍വ്വഹിച്ചിട്ടുമുണ്ട്. ഒന്നും പറയാതെ, ഐ ആം ഹിയര്‍, മായാതെ, മഞ്ഞിൽ, ജോവാന തുടങ്ങി നിരവധി ഹിറ്റ് ഗാനങ്ങളിലും നജീം പാടിയിട്ടുണ്ട്. ദൃശ്യത്തിലെ മാരിവിൽ കുട നീര്‍ത്തി എന്ന ഗാനത്തിന് കേരള ഫിലിം ക്രിട്ടിക്സ് അസ്സോസിയേഷൻ പുരസ്കാരം ലഭിച്ചിട്ടുമുണ്ട്.