'നാടിന്‍റെ തിന്മകൾ സിനിമയാക്കുന്നവർ'; അടൂരിനെ പരിഹസിച്ച് സോഹൻ റോയ്

ആൾക്കൂട്ട കൊലപാതകങ്ങളിൽ പ്രതിഷേധമറിയിച്ച് പ്രധാനമന്ത്രി നരേന്ദ്ര മോദിക്ക് കത്തയച്ച 50 ഓളം പേർക്കെതിരെ രാജ്യദ്രോഹക്കുറ്റം ചുമത്തി കേസെടുത്തത് കഴിഞ്ഞ ദിവസം വലിയ വാര്‍ത്തയായിരുന്നു. ചലച്ചിത്ര സംവിധായകൻ അടൂർ ഗോപാലകൃഷ്ണൻ ഗവേഷകനായ രാമചന്ദ്ര ഗുഹ, സംവിധായകൻ മണി രത്നം അഭിനേതാക്കളായ രേവതി, അപർണ സെൻ തുടങ്ങിയവരുള്‍പ്പെടെ നിരവധിപേര്‍ ഇതിൽ ഉള്‍പ്പെട്ടിരുന്നു.

Also Read: ആൾകൂട്ടക്കൊലപാതകങ്ങൾക്കെതിരെ പ്രധാനമന്ത്രിക്ക് കത്തെഴുതി: അടൂരിനെതിരെ കേസ്
ഇപ്പോള്‍ അടൂരിനെതിരെ രാജ്യദ്രോഹക്കുറ്റ ചുമത്തിയതിനെ ന്യായീകരിച്ച് രംഗത്തെത്തിയിരിക്കുകയാണ് സിനിമാ നിര്‍മ്മാതാവും സംവിധായകനുമായ സോഹൻ റോയ്. സോഹൻറോയ് ഇടയ്ക്കിടെ പങ്കുവയ്ക്കാറുള്ള പോയറ്റ് ട്രോൾ എന്ന ഹൈക്കുകവിത സീരീസിലൂടെയാണ് അടൂരിനെ സോഹൻ റോയ് വിമര്‍ശിച്ചിരിക്കുന്നത്. നാടിന്‍റെ തിന്മകൾ സിനിമ പോലാക്കി നാടായ നാടൊക്കെ കാട്ടി വിലസുന്നവർ നാടിന്‍റെ നന്മമരത്തെ മുറിച്ചാൽ നാട്ടിലെക്കോടതി മൗനം ഭജിക്കണോ എന്നാണ് സോഹൻ റോയ് കുറിച്ചിരിക്കുന്നത്.

Also Read: മോദിയും പിണറായിയും ഹിറ്റ്‍ലറെ പോലും നാണിപ്പിക്കുന്നു; രൂക്ഷ വിമർശനവുമായി ബെന്നി ബെഹനാൻ

രാജ്യത്തെ പ്രമുഖ വ്യക്തികൾ അയച്ച കത്തിലെ പരാമർശം പ്രധാനമന്ത്രിയുടെ പ്രതിച്ഛായ താഴ്ത്തിക്കെട്ടുന്നതാണെന്ന് ചൂണ്ടിക്കാട്ടിയായിരുന്നു പരാതിക്കാരൻ ഹര്‍ജി സമര്‍പ്പിച്ചിരുന്നത്. കൂടാതെ, ഇവരുടെ ആശയങ്ങൾ രാജ്യത്ത് വിഘടനവാദം പ്രോത്സാഹിപ്പിക്കാൻ ഉതകുന്നതാണെന്നും പരാതിക്കാരൻ പറഞ്ഞിരുന്നു. അഭിഭാഷകനായ സുധീര്‍ കുമാര്‍ ഓജയാണ് ഇവരുടെ കത്തിനെതിരെ പരാതി നൽകുകയുണ്ടായത്. ഇതോടെ ചീഫ് ജുഡീഷ്യല്‍ മജിസ്ട്രേറ്റ് സൂര്യകാന്ത് തിവാരിയാണ് ഇവർക്കെതിരെ കേസെടുക്കാൻ ഉത്തരവിട്ടിരുന്നത്.

Also Read: 'അടൂരിനെ പോലെയുള്ളവർ നാവ് വാടകയ്ക്ക് കൊടുക്കരുത്'; നടത്തിയത് അടിസ്ഥാന രഹിതമായ ആരോപണമെന്നും പികെ കൃഷ്ണദാസ്

കഴിഞ്ഞ ജൂലൈയിലായിരുന്നു 50 ഓളം പ്രമുഖരായ സാംസ്‌കാരിക പ്രവർത്തകർ കൂട്ടായി ചേർന്ന് പ്രധാനമന്ത്രിക്ക് ആള്‍ക്കൂട്ടാക്രമണങ്ങളിലടക്കം ആശങ്കയറിയിച്ച് കത്ത് എഴുതിയിരുന്നത്. 'ജയ് ശ്രീറാം' വിളി കൊലവിളിയായി മാറുന്നുവെന്ന് കാണിച്ചും രാജ്യത്തെ ദളിതരുടെയും മുസ്ലിങ്ങളുടെയും നിലനിൽപ്പിൽ ഏറെ ആശങ്കാകുലരാണെന്നും അറിയിച്ചായിരുന്നു കത്ത്.