കമല്‍ - ശ്രീവിദ്യ വിവാഹത്തിന് അമ്മ എതിര്‍ത്തതിന്റെ പ്രധാന കാരണം വെളിപ്പെടുത്തി ചേട്ടന്റെ ഭാര്യ; പിന്നീട് നല്ല ബന്ധങ്ങള്‍ വന്നിട്ടും ശ്രീവിദ്യ നിരസിച്ചത് എന്തിന്?

എന്റെ നാത്തൂന്‍ ആയതുകൊണ്ട് പറയുന്നതല്ല, സൗന്ദര്യത്തിന്റെ പൂര്‍ണ രൂപമായിരുന്നു ശ്രീവിദ്യ. അടുത്തിരുന്ന് ആ സൗന്ദര്യം താന്‍ ആസ്വദിച്ചിട്ടുണ്ട് എന്നാണ് ശ്രീവിദ്യയുടെ ചേട്ടന്റെ ഭാര്യ പറയുന്നത്. ഞങ്ങള്‍ തമ്മില്‍ അത്രയും ക്ലോസ് ആയിരുന്നു. ശ്രീവിദ്യയും കമലുമായുള്ള ബന്ധത്തെ കുറിച്ച് ഭര്‍ത്താവ് ശങ്കര്‍ പറഞ്ഞ അറിവാണ് തനിക്കുള്ളത് എന്ന് വിജയലക്ഷ്മി പറയുന്നു.

ഒരുമിച്ച് അഭിനയിച്ചതിലൂടെയാണ് കമലിനും ശ്രീവിദ്യയ്ക്കും ഇടയില്‍ ആ ഇഷ്ടം വന്നത്. അങ്ങനെ തോന്നിയപ്പോള്‍ തന്നെ കമല്‍ അത് ശങ്കറിനോട് വന്ന് പറഞ്ഞിരുന്നുവത്രെ. ശങ്കറും കമലും അത്രയും അടുത്ത സുഹൃത്തുക്കളാണ്. പെങ്ങളെ ഇഷ്ടമാണ്, കല്യാണം കഴിക്കാന്‍ താത്പര്യമുണ്ട് എന്ന് പറഞ്ഞപ്പോള്‍, അമ്മയോടും അച്ഛനോടും സംസാരിച്ച് മാത്രമേ തീരുമാനിക്കാന്‍ കഴിയൂ എന്ന് ശങ്കര്‍ പറഞ്ഞു.

അതിന് ശേഷം അമ്മയോട് സംസാരിച്ചു, പക്ഷെ അമ്മയ്ക്ക് ഒട്ടും താത്പര്യം ഉണ്ടായിരുന്നില്ല. രണ്ട് പേരും ഒരേ ഇന്റസ്ട്രിയില്‍ ഉള്ളവരാണ്. അതുകൊണ്ട് നടക്കില്ല. മാത്രമല്ല ശ്രീവിദ്യ അഭിനയത്തില്‍ തുടക്കം കുറിച്ചതേയുള്ളൂ. നായികാ റോളുകള്‍ എല്ലാം വന്നു തുടങ്ങുന്നു. ഇപ്പോള്‍ കല്യാണക്കാര്യം എടുത്തിടാന്‍ പറ്റില്ല എന്ന് വ്യക്തമാക്കി. ഏറ്റവും വലിയ പ്രശ്‌നം, കമല്‍ ശ്രീവിദ്യയെക്കാള്‍ പ്രായം കുറവാണ് എന്നതായിരുന്നു.

ശ്രീവിദ്യയ്ക്ക് കമലിനെ ഒരുപാട് ഇഷ്ടമായിരുന്നു. അമ്മയോട് സംസാരിച്ച് എങ്ങനെയെങ്കിലും ഇതിന് സമ്മതിപ്പിയ്ക്കൂ എന്ന് ശങ്കറിനോട് ശ്രീവിദ്യ പലപ്പോഴും ആവശ്യപ്പെട്ടിരുന്നുവത്രെ. കമലും ശ്രീവിദ്യയും ഒന്നിക്കുന്നതില്‍ സഹോദരന്‍ ശങ്കറിന് എതിര്‍പ്പുണ്ടായിരുന്നില്ല എന്നും വിജയലക്ഷ്മി വ്യക്തമാക്കി.

ശ്രീവിദ്യയുടെ അമ്മ, എന്റെ അമ്മായിയമ്മയുടെ ദാമ്പത്യ ജീവിതം അത്ര സുഖകരമായിരുന്നില്ല. കുടുംബത്തിലേക്കുള്ള ഏക വരുമാനം ശ്രീവിദ്യ മാത്രമായിരുന്നു. കമലുമായുള്ള വിവാഹം എതിര്‍ക്കാന്‍ അതും ഒരു കാരണമാണെന്ന് എനിക്ക് തോന്നിയിട്ടുണ്ട് എന്നാണ് നാത്തൂന്‍ പറയുന്നത്. അമ്മയും അച്ഛനും ശ്രീവിദ്യയും ശങ്കറും ഇന്ന് ജീവിച്ചിരിപ്പില്ല. ഈ സംഭവങ്ങള്‍ നടക്കുമ്പോള്‍ ഞങ്ങളുടെ വിവാഹം കഴിഞ്ഞിരുന്നില്ല, പറഞ്ഞുകേട്ട അറിവുകള്‍ മാത്രമേ തനിക്കുള്ളൂ എന്ന് വിജയലക്ഷ്മി പറയുന്നു.

കമലിനെ റിജക്ട് ചെയ്തതിന് ശേഷം ശ്രീവിദ്യയ്‌ക്കൊപ്പം അമ്മ അമേരിക്കയില്‍ ഒരു ഷോയ്ക്ക് പോയിരുന്നു. ശ്രീവിദ്യ ഭരതനാട്യം നര്‍ത്തകിയാണ്, കച്ചേരി നടത്തുന്നത് അമ്മയാണ്. രണ്ട് മാസത്തോളം അവരവിടെ ഉണ്ടായിരുന്നു. പല നല്ല വിവാഹാലോചനകളും അമേരിക്കയില്‍ നിന്നുള്‍പ്പടെ ശ്രീവിദ്യയ്ക്ക് വന്നിട്ടുണ്ട്. പക്ഷെ പല കാരണങ്ങള്‍ പറഞ്ഞ് അതെല്ലാം ശ്രീവിദ്യ ഒഴിവാക്കുകയായിരുന്നുവത്രെ