'കിനാവള്ളി'യിലൂടെ താരമാകാൻ സൗമ്യ മേനോൻ

മലയാള സിനിമ പ്രേക്ഷകർ തീയേറ്ററുകളിൽ ആഘോഷമാക്കിയ ശിക്കാരിശംഭു എന്ന കൊച്ച് ചിത്രത്തിന്‍റെ വിജയത്തിന് ശേഷം, തന്‍റെ പതിവിൽ നിന്ന് മാറി അരങ്ങിലും അണിയറയിലും ഒരുകൂട്ടം പുതുമുഖങ്ങളെ അണിനിരത്തി, മലയാളത്തിലും തമിഴിലുമായി ഒരേപോലെ അണിയിച്ചൊരുക്കുന്ന കിനാവള്ളി എന്ന പുതിയ ചിത്രവുമായി സുഗീത് വീണ്ടും എത്തുകയാണ്.

സിനിമയിൽ ആദ്യമായാണ് മുഖം കാണിക്കുന്നത് എങ്കിലും, കിനാവള്ളി എന്ന ഈ ചിത്രത്തിലെ നായികമാരില്‍ ഒരാളായ സൗമ്യയെ ഒരുപക്ഷെ മലയാളികൾക്ക് സുപരിചിതയാണ്. കുറച്ചുകാലം മുന്നേ ഇറങ്ങി പ്രേക്ഷക പ്രീതി നേടിയ മിഴിനീർ എന്ന ആൽബത്തിലെ "വണ്ണാത്തി "എന്ന ഗാനത്തിലൂടെ മലയാളികളുടെ മനസ്സിൽ ഇടം നേടിയ സൗമ്യയാണ് കിനാവള്ളികൾ എന്ന ഈ ചിത്രത്തിലെ പ്രധാന കഥാപാത്രങ്ങളിൽ ഒരാളായ സ്വാതിയെ അവതരിപ്പിക്കുന്നത്.

ആറു പുതുമുഖ താരങ്ങളെ അണിനിരത്തി പ്രണയത്തിലൂടെയും നല്ല സൗഹൃദങ്ങളിലൂടെയും, യുവത്വത്തിന്‍റെ കഥപറയുന്ന ചിത്രത്തിൽ, ഈ ചങ്ങാതിക്കൂട്ടത്തിന്‍റെ ഒരുവിധം എല്ലാ പ്രശ്നങ്ങളുടെയും പരിഹാര പരികർമിയാണ് കൊച്ച് സ്വാതി. ഒരുതരത്തിൽ ഈ ചങ്ങാതികൂട്ടത്തിന്‍റെ കേന്ദ്രം തന്നെയാണ് സൗമ്യ അവതരിപ്പിക്കുന്ന സ്വാതി എന്ന കഥാപാത്രം.