തമിഴകത്തെ സിനിമാ സമരം അവസാനിച്ചു

തമിഴ് സിനിമാ നിര്‍മ്മാതാക്കള്‍ നടത്തിവന്ന സമരം അവസാനിച്ചു. തമിഴ് സിനിമാ ചരിത്രത്തിലെ എറ്റവും ദൈര്‍ഘ്യമേറിയ സമരമായിരുന്നു ഇത്തവണ നടന്നിരുന്നത്. വിവിധ സിനിമാ സംഘടനകള്‍ മന്ത്രി കടമ്പൂർ രാജുവിന്റേ സാന്നിദ്ധ്യത്തില്‍ നടത്തിയ ചര്‍ച്ചകളോടെയാണ് സമരം അവസാനിച്ചത്. മാര്‍ച്ച്‌ 16ന് ആരംഭിച്ച സമരത്തിന്റെ പശ്ചാത്തലത്തില്‍ നേരത്തെ പുതിയ സിനിമകളുടെ ഷൂട്ടിംഗ് നിര്‍ത്തിവെക്കണമെന്നും സിനിമകള്‍ റിലീസ് ചെയ്യരുതെന്നും നിര്‍മ്മാതാക്കള്‍ ആവശ്യപ്പെട്ടിരുന്നു.

ഓണ്‍ലൈന്‍ ടിക്കറ്റുകളുടെ ചാര്‍ജ്ജ് കുറയ്ക്കുക,കമ്പ്യൂട്ടറസൈഡ് ടിക്കറ്റിംഗ് ഏര്‍പ്പെടുത്തുക തുടങ്ങിയ ആവശ്യങ്ങളോടെയായിരുന്നു നിര്‍മ്മാതാക്കള്‍ സമരം നടത്തിയിരുന്നത്. സമരം അവസാനിച്ച കാര്യം പ്രൊഡ്യൂസര്‍ കൗണ്‍സില്‍ നേതാവും നടനുമായ വിശാലാണ് ട്വിറ്ററിലൂടെ അറിയിച്ചത്. സമരം ആരംഭിച്ചതോടെ നിരവധി ചിത്രങ്ങളുടെ റിലീസാണ് തമിഴ്‌നാട്ടില്‍ മുടങ്ങിയിരുന്നത്. ഒന്നര മാസം കൊണ്ട് കോടിക്കണക്കിന് രൂപയുടെ നഷ്ടമാണ് തമിഴ് ഇന്‍ഡസ്ട്രിയ്ക്ക് ഉണ്ടായത്. ഒത്തുതീര്‍പ്പു ചര്‍ച്ചയില്‍ നിര്‍മ്മാതാക്കളുടെ എല്ലാവിധ ആവശ്യങ്ങളും സര്‍ക്കാര്‍ പരിഗണിച്ചിരുന്നു.