രണ്ടാം വരവിൽ കൂടെകൂട്ടിയ ഫഹദിസം!!!

ശരിക്കും പറഞ്ഞാൽ പപ്പയുടെ സ്വന്തം അപ്പൂസിലാണ് തുടക്കം. 1992-ൽ ഉപ്പ ഫാസിൽ പിടിച്ച ചിത്രത്തിൽ ബാലതാരമായി ചെറിയൊരു റോളിൽ. പിന്നെ യുവാവായപ്പോൾ 2002-ൽ സച്ചിൻ മാധവൻ എന്ന കഥാപാത്രമായി കൈയ്യെത്തും ദൂരത്ത് എന്ന ചിത്രത്തിലൂടെ നായകനായി അരങ്ങേറ്റം. പക്ഷേ മലയാളികൾ ആ താരത്തെ ഏറ്റെടുത്തില്ല. പിന്നെ ഒരു പോക്കായിരുന്നു. വിദേശരാജ്യങ്ങളിലെ പഠനം. വീണ്ടും 2009-ൽ ഏഴ് വർഷങ്ങൾക്ക് ശേഷം ഒരു രണ്ടാംവരവ്. കേരളകഫേയിൽ മൃത്യഞ്ജയം എന്ന ചെറുചിത്രത്തിലെ ജേർണലിസ്റ്റ് വേഷം. 2010-ൽ പ്രമാണി, കോക്ടെയ്ൽ, ടൂർണമെന്‍റ്, ബെസ്റ്റ് ഓഫ് ലക്ക്. 2011-ൽ ചാപ്പാകുരിശ്. അതിലൂടെ ഫഹദ് തന്‍റെ താരാപഥം ഏതാണ്ട് ഉറപ്പിച്ചു.

പിന്നെ ഇന്ത്യൻ റുപ്പീ, 2012-ൽ പത്മശ്രീ ഭരത് ഡോ.സരോജ് കുമാർ, 22 ഫീമെയിൽ കോട്ടയം, ഡയമണ്ട് നെക്ലേസ്, ഫ്രൈഡേ, 2013-ൽ അന്നയും റസൂലും, നത്തോലി ഒരു ചെറിയ മീനല്ല, റെഡ്‍വൈൻ, ആമ്മേൻ, ഇമ്മാനുവൽ, അകം, 5 സുന്ദരികളിലെ ആമി, ഒളിപ്പോര്, ആർടിസ്റ്റ്, നോ‍ർത്ത് 24 കാതം, ഡി കമ്പനി, ഒരു ഇന്ത്യൻ പ്രണയകഥ, 2014-ൽ വൺ ബൈ ടു, ഗോഡ്സ് ഓൺ കൺട്രി, ബാംഗ്ലൂർ ഡെയ്സ്, മണി രത്നം, ഇയ്യോബിന്‍റെ പുസ്തകം, 2015-ൽ മറിയം മുക്ക്, ഹരം, അയാൾ ഞാനല്ല, 2016-ൽ മൺസൂൺ മാംഗോസ്, മഹേഷിന്‍റെ പ്രതികാരം, 2017-ൽ ടേക്ക് ഓഫ്, റോൾ മോഡൽസ് ഇപ്പോൾ തൊണ്ടിമുതലും ദൃക്സാക്ഷിയുമിലെ കള്ളൻ പ്രസാദ് വരെയുള്ള വേഷങ്ങൾ. ഇനി വരാനുള്ള ചിത്രങ്ങളായ ആണെങ്കിലും അല്ലെങ്കിലും, കാർബൺ, ട്രാൻസ്, നാളെ എന്നിവയും. കൂടാതെ ജോബ് കുര്യന്‍റെ എന്താവോ എന്ന മ്യൂസിക് വീഡിയോ. തമിഴിൽ ഒരുങ്ങുന്ന വേലൈക്കാരൻ, അനീതി കഥൈകൾ എന്നിവയുമുണ്ട്.

2002ൽ ചോക്ലേറ്റ് ഹീറോയായിരുന്നെങ്കിൽ 7 വര്‍ഷങ്ങൾക്ക് ശേഷം തിളങ്ങുന്ന കണ്ണും ഭംഗിയുള്ള കഷണ്ടിയുമുള്ള ലക്ഷണമൊത്ത നടനായി അയാളുടെ രണ്ടാം വരവ്. കള്ളനായല്ല എരുമയായിട്ടുവരെ അഭിനയിക്കുമെന്ന് പറയുന്ന സിനിമാ സംഭാഷണശകലം അയാളുടെ കഥാപാത്ര നിർമ്മിതിയിൽ ഭദ്രം. കണ്ണ് കൊണ്ട് കഥ പറഞ്ഞ് പതിഞ്ഞ ചിരി കൊണ്ട് വിസ്തമയിപ്പിച്ച് ഒരു പ്രത്യേക രസത്തിൽ അയാളങ്ങനെ ഓടമ്പോൾ നടനെ വിശ്വസിച്ച് ടിക്കറ്റെടുക്കാം എന്ന ബ്രാൻഡ് അദ്ദേഹം പതിയെ രൂപപ്പെടുത്തുകയുമാണ്.

Fahadism a comeback

The story of Fahad Faasil's amazing comeback.