ദിലീപ് 'അമ്മ'യിൽ: രൂക്ഷമായി പ്രതികരിച്ച് നടൻ തിലകൻ്റെ മകൾ

തിരുവനന്തപുരം: അമ്മ-ദിലീപ് വിഷയത്തിൽ പ്രതികരണവുമായി നടൻ തിലകൻ്റെ മകൾ രംഗത്ത്. 'അമ്മ'യ്ക്ക് ഇരട്ട നീതിയാണോ എന്ന് നടൻ തിലകൻ്റെ മകൾ സോണിയ പ്രതികരിച്ചു. കോടതി വിധി വരും മുമ്പെ ക്രിമിനല്‍ കേസിലെ പ്രതിയെ തിരിച്ചെടുത്ത 'അമ്മ' അതേ സംഘടനയില്‍ നിന്ന് മരിക്കും വരെ പുറത്താക്കപ്പെട്ട നടന്‍ തിലകനോട് കാട്ടിയത് സൗകര്യ പൂര്‍വ്വം മറക്കരുതെന്നും അവര്‍ പറഞ്ഞു. ദിലീപിനോട് സംഘടന കാണിച്ച പരിഗണന അച്ഛന് ലഭിച്ചില്ലെന്നും സോണിയ പ്രതികരിച്ചു. ദിലീപിന്‍റെ വിശദീകരണം കേട്ടില്ലെന്ന ന്യായം ചൂണ്ടിക്കാട്ടി ദിലീപിനെ തിരിച്ചെടുക്കുമ്പോള്‍ ആ പരിഗണന തന്‍റെ അച്ഛന് ലഭിച്ചില്ലെന്നും സോണിയ ആരോപിച്ചു. മാതൃഭൂമി ന്യൂസ് ചാനലിനോട് സംസാരിക്കവേ ആണ് സോണിയ പ്രതികരണം രേഖപ്പെടുത്തിയത്. ഇതിനോടൊപ്പം 2010ൽ തിലകൻ 'അമ്മ'യ്ക്കെഴുതിയ കത്തും പുറത്ത് വിട്ടിട്ടുണ്ട്.



2010ല്‍ 'അമ്മ' സംഘടനയുടെ ജനറല്‍ സെക്രട്ടറിയായിരുന്ന മോഹന്‍ലാലിന് എഴുതിയ കത്തില്‍ അംഗങ്ങളുടെ അവകാശം ചവിട്ടി മെതിക്കുമ്പോള്‍ 'അമ്മ'യുടെ മൗനം അക്ഷന്തവ്യമായ തെറ്റാണെന്നും 'അമ്മ' ജനാധിപത്യ മര്യാദകളുടെ ലംഘനം ന്യായീകരിക്കുന്ന സംഘടനയാണെന്നും തിലകൻ ചൂണ്ടിക്കാട്ടിയിരിക്കുന്നു. കൂടാതെ അച്ചടക്ക സമിതിയില്‍ ഹാജരാകാതിരുന്ന വിഷയത്തിൽ തന്‍റെ ഭാഗത്തു നിന്നും വിശദീകരണം കേള്‍ക്കാതെ തന്നെ ഏകപക്ഷീയമായി പുറത്താക്കിയതും തിലകന്‍ കത്തില്‍ ചൂണ്ടിക്കാട്ടിയിട്ടുണ്ട്.



തന്നെ മാറ്റിനിര്‍ത്തിയതിനു പിന്നില്‍ തലസ്ഥാനത്തെ ഒരു വിഭാഗം സിനിമ രാജാക്കന്‍മാരാണ്. ഗണേഷിന്‍റെ ഗുണ്ടകളില്‍ നിന്ന് ആക്രമണവും വധഭീഷണിയും ഉള്ളതായി പരാതിപ്പെട്ടിട്ടും 'അമ്മ'യിൽ നിന്ന് യാതൊരുവിധ നടപടിയും ഉണ്ടായില്ല. മാധ്യമങ്ങളിലൂടെയാണ് തന്നെ സംഘടനയില്‍ നിന്ന് പുറത്താക്കിയ വിവരം അറിയുന്നത്. വിവാദ പരാമര്‍ശങ്ങൾ മൂലം കരാറിലേര്‍പ്പെട്ടിരുന്ന ചിത്രങ്ങളില്‍ നിന്നു പോലും തന്നെ ഒഴിവാക്കിയെന്നും തിലകൻ കത്തിൽ ചൂണ്ടിക്കാട്ടുന്നു.