‘പൽവാൽ ദേവൻ മോഡ് ഓൺ’ എന്ന് ടൊവിനോ തിരുത്തലുമായി ആരാധകര്‍

ടൊവിനോ ഇപ്പോൾ ചൈനാ സന്ദര്‍ശനത്തിലാണ്. യാത്രയ്ക്കിടെയുള്ള നിമിഷങ്ങളൊക്കെ താരം ആരാധകരുമായി പങ്കുവെക്കാറുമുണ്ട്. അത്തരത്തിലൊരു ചിത്രം പങ്കുവെച്ചിരിക്കുകയാണ് താരമിപ്പോൾ. കുടുംബവുമൊത്തുള്ള താരത്തിൻ്റെ വിനോദയാത്രയ്ക്കിടെ ചൈനയിലെ ഷാങ്ഗായിലെ ബണ്ട് ബുള്ളിന്റെ മുന്നിൽ നിന്നെടുത്ത ചിത്രമാണ് ഇപ്പോൾ ശ്രദ്ധേയമാകുന്നത്. ചൈന യാത്രയ്ക്കിടെ ഭാര്യയ്ക്കും മകള്‍ക്കും ഒപ്പം പകര്‍ത്തിയ നിരവധി ചിത്രങ്ങള്‍ ടൊവിനോ സോഷ്യല്‍ മീഡിയയില്‍ പോസ്റ്റ് ചെയ്തിട്ടുണ്ട്.

കേരളത്തിൽ ഏറ്റവുമധികം പണം വാരിയ അന്യ ഭാഷാ ചിത്രങ്ങളിലൊന്നായ ബാഹുബലിയിലെ പൽവാൽ ദേവനെ അനുകരിച്ചുള്ള ചിത്രമാണ് താരമിപ്പോൾ പങ്കുവെച്ചിട്ടുള്ളത്. ചിത്രത്തിലെ നായക കഥാപാത്രമായ അമരേന്ദ്ര ബാഹുബലിക്കൊപ്പം പ്രേക്ഷക പ്രീതി നേടിയ റാണ ദഗ്ഗുബാട്ടി അവതരിപ്പിച്ച കഥാപാത്രമാണ് പൽവാൽ ദേവൻ. ചിത്രത്തിൽ പൽവാൽ ദേവൻ കാളയെ മെരുക്കുന്ന രംഗമാണ് ടൊവിനോ അനുകരിക്കാൻ ശ്രമിച്ചത്.

ബണ്ട് ബുള്ളിൻ്റെ കൊമ്പുകളിൽ താരം ആഞ്ഞ് പിടിച്ച് ഫോട്ടോയ്ക്ക് പോസ് ചെയ്യുകയാണ്. പൽവാൽ ദേവനാണെന്ന് ടൊവിനോ പറഞ്ഞപ്പോൾ ആരാധകര്‍ ചെറിയ തിരുത്തലുമായി രംഗത്തെത്തി. ഇത് കുപ്രസിദ്ധ പയ്യനാണെന്നാണ് ആരാധകര്‍ ചൂണ്ടിക്കാട്ടുന്നത്. കൊമ്പ് ഊരിയെടുക്കാനും, പോത്തിനെ മലർത്തിയടിക്കാനും ആരാധകര്‍ കമൻ്റായി കുറിച്ചിട്ടുണ്ടെന്നതാണ് രസകരം. മറ്റു ചിലരോ കട്ടപ്പയെ വിളിക്കാനും പറയുന്നുണ്ട്.


ടൊവിനോ നായകനായ കൽക്കിയാണ് താരത്തിൻ്റേതായി ഒടുവിൽ പുറത്തിറങ്ങിയ ചിത്രം. ചിത്രത്തില്‍ താരം കലിപ്പനായ പൊലീസ് ഓഫീസറുടെ വേഷത്തിലായിരുന്നു പ്രത്യക്ഷപ്പെട്ടത്. സംയുക്താ മേനോനായിരുന്നു ചിത്രത്തിലെ നായിക. എടക്കാട് ബറ്റാലിയന്‍ 06 എന്ന ചിത്രമാണ് താരത്തിൻ്റേതായി ഇനി റിലീസിനൊരുങ്ങുന്നത്.