അ‍ര്‍ജിത് സിങ്ങിൻ്റെ വലിയ ഫാനാണ്.., ദിവസവും ആ ശബ്ദം കേൾക്കും: നിത്യ മാമ്മൻ

ടൊവിനോ നായകനാകുന്ന 'എടക്കാട് ബെറ്റാലിയൻ 06' എന്ന ചിത്രത്തിലെ നീ ഹിമമഴയായി വരൂ... ഹൃദയം അണിവിരലാൽ തൊടൂ... എന്ന ഹിറ്റ് ഗാനത്തിലൂടെ സംഗീത പ്രേമികളുടെ പ്രിയങ്കരിയായി മാറിയ നിത്യ മാമ്മൻ തൻ്റെ സംഗീത ലോകത്തെ ഇഷ്ടങ്ങളെക്കുറിച്ച് വാചാലയാകുകയാണ്. എല്ലാത്തരം പാട്ടുകളും ആലപിക്കാൻ ശ്രമിക്കുമ്പോഴും താൻ ഏറെ കേൾക്കുന്നത് ഗസലുകളാണെന്നാണ് ഈ നവാഗത ഗായിക പറയുന്നത്. സമയം മലയാളത്തിന് അനുവദിച്ച പ്രത്യേക അഭിമുഖത്തിലാണ് നിത്യ തൻ്റെ ആദ്യ പിന്നണി ഗാനത്തെ കുറിച്ചും സംഗീതപ്രിയത്തെ കുറിച്ചും വാചാലയായത്.

ആറു വര്‍ഷത്തോളമായി സംഗീതം അഭ്യസിക്കുന്നുണ്ട്. സംഗീതത്തോട് ചെറുപ്പം മുതൽ നല്ല താത്പര്യവുമുണ്ട്. കൈലാസ് മേനോൻ സംഗീതം നിര്‍വ്വഹിക്കുന്ന എടക്കാട് ബെറ്റാലിയനിലേക്ക് സൗണ്ട് ടെസ്റ്റ് അയച്ചു നൽകുകയായിരുന്നു ആദ്യം. അത് എല്ലാവര്‍ക്കും ഇഷ്ടമായതിനാലാണ് ട്രാക്ക് പാടാനെത്തിയത്. നിത്യ പറയുന്നു. ശ്രേയ ഘോഷാൽ ആലപിക്കാനിരുന്ന ഗാനമാണ് നിത്യ ട്രാക്ക് പാടിയത്.


ട്രാക്ക് പാടി ഇഷ്ടമായതോടെ അത് സിനിമയിലേക്ക് ഉപയോഗിക്കുകയായിരുന്നു. ഏറെ പ്രിയം അര്‍ജുൻ സിങിൻ്റെ ഗാനങ്ങളോടാണ്. എന്നും കേൾക്കും ആ പാട്ടുകൾ. ഒരു രക്ഷയും ഇല്ലാത്ത ആലാപന ശൈലിയാണ് അദ്ദേഹത്തിൻ്റേത്. ചില ഗാനങ്ങളൊക്കെ അദ്ദേഹത്തിന് മാത്രമേ അങ്ങനെ പാടാൻ സാധിക്കൂ എന്ന് തോന്നിപ്പോകും. അദ്ദേഹത്തിൻ്റെ ഏത് പാട്ടാണ് മികച്ചതെന്ന് ചോദിച്ചാൽ കുഴപ്പത്തിലാകും. എല്ലാം ഒന്നിനൊന്ന് മെച്ചമാണ്. നിത്യ പറഞ്ഞു.


ആദ്യഗാനം തന്നെ ഇത്ര ഹിറ്റായതിൻ്റെ സന്തോഷത്തിലാണ് കക്ഷി. പഴയ സഹൃത്തുക്കളൊക്കെ വിളിച്ച് അഭിനന്ദനം അറിയിച്ചെന്നും എല്ലാം വലിയ സന്തോഷം തന്നെയാണ് നൽകുന്നതെന്നും നിത്യ പറഞ്ഞു.