ഉപ്പും മുളകും സംവിധായകനെ മാറ്റി, നിഷ സാരംഗ് തുടരും

കൊച്ചി: ഫ്ലവേഴ്സ് ചാനലിലെ ജനപ്രിയ പരമ്പരയായ 'ഉപ്പും മുളകും' സംവിധായകന്‍ ആര്‍.ഉണ്ണികൃഷ്ണനെ മാറ്റിയെന്ന് ചാനല്‍ വ്യകതമാക്കി. മാനേജിങ് ഡയറക്ടര്‍ ആര്‍ ശ്രീകണ്ഠന്‍ നായരാണ് ഇക്കാര്യം അറിയിച്ചത്. നടി നിഷാ സാരംഗിനോട് മോശമായി പെരുമാറിയതിനെത്തുടര്‍ന്ന് ഇയാളെ മാറ്റണമെന്ന ആവശ്യവുമായി വിവിധ സിനിമാ സംഘടനകള്‍ അടക്കമുള്ളവര്‍ രംഗത്ത്‌ വന്നിരുന്നു. ഇയാള്‍ക്ക് പകരം ഇനി പുതിയ സംവിധായകനെത്തും.

നിഷ സാരംഗ് തുടര്‍ന്നും പരിപാടിയിലെ നീലിമ എന്ന കഥാപാത്രത്തെ അവതരിപ്പിക്കും. ഫ്ലവേഴ്സ് ചാനല്‍ നേരിട്ട് നിര്‍മിക്കുന്ന പരമ്പരയാണ് ഉപ്പും മുളകും. ഫ്ളവേഴ്സ് ചാനലിലെ ക്രിയേറ്റിവിറ്റി ഭാഗത്തിലെ ഉന്നത പദവിയിലുള്ള വ്യക്തി നേരിട്ടായിരിക്കും ഇനി മുതൽ ഉപ്പും മുളകും പരമ്പരയുടെ സംവിധാന ചുമതല നിർവഹിക്കുകയെന്നും ആർ ശ്രീകണ്ഠൻ നായർ അറിയിച്ചു.

ഉപ്പും മുളകും പരമ്പരയിലെ അഭിനേത്രി ഉന്നയിച്ച പരാതിയിൽ നിയമ നടപടികൾ പുരോഗമിക്കുന്നതിനാൽ ഇതേക്കുറിച്ചു കൂടുതൽ പ്രതികരിക്കാനാവില്ലെന്നു കൂട്ടിച്ചേർത്ത അദ്ദേഹം ഉപ്പും മുളകും സീരിയലിൽ നിലവിലുള്ള എല്ലാ ജനപ്രിയ താരങ്ങളും തുടർന്നും അഭിനയിക്കുമെന്നും വ്യക്തമാക്കി. ഫേസ്ബുക്ക് ലൈവിലൂടെയാണ് അദ്ദേഹം ഇക്കാര്യം പ്രേക്ഷകരെ അറിയിച്ചത്.